Орташа жылдамдықты бақылау Қазақстанда камералар қай жерде жұмыс істеп тұр

Қазақстан жолдарында орташа жылдамдықты бақылау жүйесін кеңейту туралы бірнеше айдан бері айтылып келеді. Бұған дейін Үкімет жалпы ұзындығы шамамен 2,9 мың шақырым жолдың тағы 18 учаскесінде енгізу жоспарланып отырғанын хабарлаған болатын.

Орташа жылдамдықты бақылау жүйесі қазір қай жерлерде жұмыс істеп тұр және оны тағы қай жерлерде іске қосу жоспарланған? Осы сұрақпен Tengri Auto редакциясы ІІМ-не жүгінді.

Министрлік бүгінде орташа жылдамдықты бақылау еліміздің алты өңіріндегі 20 учаскеде жұмыс істейтінін хабарлады.

Абай облысында камералар Павлодар - Семей - Қалбатау тасжолының үш учаскесінде орнатылған.

Ақмола облысында жүйе Астана - Павлодар және Астана - Щучинск жолдарында жұмыс істейді.

Батыс Қазақстан облысында Орал - Саратов тасжолының бір учаскесі бақылауға алынды.

Павлодар облысында орташа жылдамдық үш тасжолда өлшенеді:

Астана - Павлодар Павлодар - Омбы Павлодар - Семей - Қалбатау.

Түркістан облысында камералар Шымкент - Қызылорда және Шымкент - Тараз жолдарында, ал Қызылордада жүйе әзірге Шымкент - Қызылорда тасжолының бір учаскесінде жұмыс істеп тұр.

ІІМ мәліметінше, 17 наурыз бен 23 шілде аралығында бұл учаскелерде жылдамдық режимін бұзудың 600 мыңнан астам жағдайы анықталған.

Бұл ретте министрлік бұған дейін хабарланған қалған учаскелер қашан іске қосылатынын және олардың қайсы дайындық деңгейі жоғары екенін нақтыламады.

Орташа жылдамдық деген не?

2024 жылғы 4 желтоқсанда жолдарда орташа жылдамдықты асырғаны үшін жүргізушілерге айыппұл салуды қарастыратын заң өз күшіне енді.

Еске сала кетейік, көлік құралының орташа жылдамдығы - бұл республикалық маңызы бар ортақ пайдаланылатын жол учаскесінің ұзындығын көлік құралының сол аралықты жүріп өткен уақытына қатынасы ретінде есептелетін көрсеткіш.

Яғни, жүргізушілер А пунктінен Б пунктіне дейінгі арақашықтықты белгіленген уақытта жүріп өтуі тиіс, сәл кешігуге болады, бірақ одан ерте жетуге болмайды.

10 шілдеден бастап ақылы жолдар қатарына жалпы ұзындығы 525 шақырым болатын тағы бес учаске қосылды:

Ақтөбе – Қандыағаш; Алматы – Қорғас; Көкшетау – Петропавл; Астана – Теміртау және Астана – Щучье тасжолдарының қосымша учаскелері.

Тағы оқыңыз: “Ақтауға болмайды“ - “ҚазАвтоЖол“ нашар жолдар туралы

Google News арқылы жаңалықтарымызды қадағалаңыз

Жазылу