Өскемен жылу электр стансасында жаңа энергоблоктың іргетасы қаланды

Шығыс Қазақстан облысында Өскемен жылу электр стансасының (ЖЭО) жаңа энергетикалық блогының іргетасын қалау рәсімі өтті. Іс-шараға Энергетика министрі Ерлан Ақкенжанов, Шығыс Қазақстан облысының әкімі Нұрымбет Сақтағанов және Halyk bank Басқарма төрағасының орынбасары Ольга Вурос қатысты.

Жобаны «Қазақстандық коммуналдық жүйелер» компаниялар тобының құрамына кіретін Өскемен жылу электр стансасы жүзеге асырып жатыр.

«Жобаның нәтижесінде шамамен 300 тұрғын үй мен әлеуметтік нысандар жылумен қамтамасыз етіліп, шамамен 50 жаңа жұмыс орны құрылады. Үкімет пен бизнестің бірлескен жұмысы аймақтың одан әрі дамуына, инвестициялық тартымдылығын арттыруға және ең бастысы, азаматтардың өмір сүру сапасын жақсартуға жағдай жасайды», – деді «Қазақстандық коммуналдық жүйелер» бақылау кеңесінің төрағасы Дінмұхамет Ыдырысов. 

140 миллиард теңгелік жобаны халықаралық және қаржы институттары қаржыландырды. Қазақстанның ең ірі банкі – Halyk және Еуразиялық даму банкі серіктес болды.

Halyk басқарма төрағасының орынбасары Ольга Вуростың айтуынша, бұл тек энергетикалық инфрақұрылымға салынған инвестиция ғана емес, сонымен қатар аймақтың дамуына және тұрғындардың өмір сүру сапасын жақсартуға қосқан ұзақмерзімді үлес.

Өскемен ЖЭО-да жаңа энергия блогының құрылысы туралы Ольга Вурос: «Инвестиция туралы айтатын болсақ, әр санның артында адамдар тұрғанын есте ұстаған жөн. Бұл жылумен, электр энергиясымен қамтамасыз етілетін отбасылар және үздіксіз қызмет пен даму үшін сенімді инфрақұрылым алатын кәсіпорындар туралы. Сондықтан бізге қоғам үшін ұзақмерзімді құндылық туғызатын жобаларды қолдау маңызды», – деді.

Аймаққа қандай пайдасы бар?

«Қазақстандық коммуналдық жүйелер» жобасы қазіргі уақытта 287,8 Гкал/сағ болатын жылу қуатының тапшылығын азайтатынын нақтылады. Жылумен жабдықтау компаниясы жаңа энергоблоктың құрылысы тұрғын үй құрылысын, әлеуметтік инфрақұрылымды дамытуға және өнеркәсіптік өсімге резерв жасайтынына сенімді.

Жаңа энергоблок сағатына 400 тонна бу өндіретін №16 қазандық блогын және 100 МВт электр қуаты бар №13 турбинаны қамтиды.

Экологияны сақтаудағы артықшылығы 

Жоба халықаралық талаптарға сәйкес келетін заманауи технологиялық шешімдерді енгізуді көздейді. 

Жаңа энергоблок ҚР Экологиялық кодексінің талаптарына және еуропалық стандарттарға сай келетін жоғары тиімді экологиялық жүйелермен жарақтандырылатын болады. Заманауи тазарту технологиялары жылу және электр энергиясының экологиялық таза өндірісін қамтамасыз ете отырып, азот пен күкірт оксидтерінің шығарындыларын едәуір төмендетуге мүмкіндік береді.