Өскеменде шалғай аудандардан келген әйелдер онкологиялық тексеруден өтті

Өскеменде облыстың шалғай аудандарынан келген әйелдер онкологиялық тексеруден өтті.

Ауыл мен шағын қалалар тұрғындары аймақтық онкология және хирургия орталығына арнайы автобустармен жеткізілді. Оларды маммолог және гинеколог дәрігерлер кезексіз әрі тегін қабылдап, кеңес берді. Сонымен қатар толыққанды зерттеулер, оның ішінде компьютерлік томография мен цитологиялық талдаулар жүргізілді. Облыста аурулардың алдын алу мақсатында осындай скринигтер жүйелі өтіп тұрады. Соның нәтижесінде сүт безі обырының 52 пайызы бастапқы кезеңде анықталған.

Гүлмира Сағидуллина, ШҚО онкология және хирургия орталығының директоры:

- Бұл акция үшінші жыл қатарынан өткізіліп отыр. Шара өз жалғасын табады деген сенімдеміз. Бірінші кезекте қайта құрылған Марқакөл, Күршім, Қатон-Қарағай аудандарын қамтыдық. Бұл елді мекендерде тұратын әйелдер бірнеше рет тексерістен өтті.

Оксана Вяткина, алтай ауданының тұрғыны:

- Біз сияқты шалғай аудандардың тұрғындары үшін бұл өте маңызды. Себебі біздің қалада мұндай жоғары деңгейдегі клиника да, мамандар да жоқ.