Өскеменде жылу тапшылығы бар

Өскеменді жылумен қамтамасыз ететін коммуналдық кәсіпорынның 16 қазандығы мен аудандардағы жылу орталықтары жаңғыртылады. Ал үш жылдан кейін тағы бір жылу электр орталығы салынады. Құрылысты жергілікті компания жүргізеді. Ауқымды жобаны энергетика министрлігі мақұлдады.

Жалпы қалада энергия тапшылығы бар. Биыл 200 мың шаршы метр тұрғын үй салынды. «Жаңа нысанның барлығы орталық жылу желісіне қосылған кезде жылу жетпей қалады», - дейді мамандар. 

Қазірдің өзінде қалаға 260 гигакалория жылу жетіспейді. Бұл тапшылық 2027 жылға қарай айтарлықтай өсуі мүмкін. Сондықтан облыс орталығына жылу беріп тұрған екі ірі кәсіпорынның күшін біріктіруге шешім қабылданды. Ол үшін шаһардың екі шетінде орналасқан жылу орталықтарын жалғайтын магистралдық желі тартылады. Бұл Соргин жылу электр орталығы. Мұнда үш қазандық пен екі турбина жұмыс істеп тұр. Негізінен қаланың шеткері аудандары мен металлургиялық кәсіпорындарды жылумен қамтиды. Болашақта бұл орталықтағы артық энергия қаланың орталығына қарай бағытталмақ. Ол үшін Өскеменнің басты жылу электр орталығына дейін 15 шақырым құбыр тарту керек.

Нұрлан Рамазанов, Соргин Жэо директоры:

- Қазір бізде шамамен 40 процент профицит, қосымша абоненттерді қоса аламыз. Яғни бұл жоба қазір жергілікті тақарушы органдармен жұмыс жасап жатырмыз. Сараптамаға 2026 жылдың басында кіреді, яғни сараптаманы алсақ 2026-27 жылдары осы жобаны іске асыру мүмкіндігі бар.

Екі жылу электр орталығын жалғайтын құбыр бюджет қаржысына салынады.  Мамандар: «Тұтынушы көлемі артқан соң кәсіпорынның табысы да көбейіп, орталықтағы қазандықтарды жаңартуға болады», - дейді. Бұл ретте алдағы бес жылда Соргин жылу электр орталығының қуатын 125 мегаваттқа дейін арттыру жоспары бар. Ал Өскемен жылу электр орталығында қазір 16 қазандықтың құрылысы жүріп жатыр. Дегенмен оның өзі жылу тапшылығын жоя алмайды. Сондықтан жаңадан тағы бір кәсіпорын салынады. 

Рузиля Әбдірашитова, облыстық энергетика және түкш басқармасының бөлім басшысы:

- Қалада тағы бір жылу электр орталығын салған жағдайда жылу тапшылығы түпкілікті жойылады. Ол кәсіпорын жоспар бойынша 2029 жылдың 4-ші тоқсанында қолданысқа берілуі тиіс. Сонда қаладағы энергия қуатының көлемі мың гигакалорияға өседі. 

Жаңа жылу электр орталығын жергілікті компания салады. Жұмыс жоспары энергетика министрлігімен келісілген. Қоршаған ортаға зиян келтірмеу үшін кәсіпорын тек сапалы көмірмен жұмыс істейтін болады және улы газға қарсы сүзгілер орнатылады. Жоба сәтті жүзеге асқан соң экологиялық талапқа сай келмейтін шағын қазандықтар біртіндеп жойылады.

Авторлары: Елдос Кәкенов, Вячеслав Ветлугин, Дмитрий Пыхтин, Өскемен