Отандық нейрохирургия дамып келеді

Биыл Шымкентте нейрохирургиялық ауруларға 160-тан астам жоғары технологиялық операция сәтті жасалды.

Күрделі операцияларды отандық дәрігерлердің өздері жүргізіп, шетелден келген науқастарға да көмек көрсетті.

Шымкенттен шипа іздегендердің қатарында Өзбекстан, Тәжікстан, Ресей мен Моңғолия азаматтары да бар. Сала мамандарының айтуынша қолға алынған заманауи әдістемелер медициналық туризмнің дамуына оң әсер еткенін айтады.

Нейрохирургиялық орталықта жоғары технологиялық операциялардың 80% енгізілді. Жаңа микроскоп жүйке жүйесін 16 есе үлкейтіп көрсетуге мүмкіндік береді. Озық тәжірибе күрделі операциялардың қауіпсіздігін арттырды.

Еркін Медетов, дәрігер-нейрохирург:

- Өйткені адамның көзі көп нәрсені көруге мүмкіндігі жоқ. Бұл операциялық микроскоп келгелі бері осындай күрделі оталарды жасауға мүмкіндігіміз кеңейді.

Биыл нейрохирург Еркін Медетовтың жетекшілігімен 160-тан астам операция сәтті жасалды. Ем қабылдағандар қатарында Өзбекстан, Тәжікстан, Ресей және Моңғолия азаматтары да бар. Шетелдіктер отандық дәрігерлердің сапалы қызметіне қызығып, кәсіби біліктілігіне зор сенім білдірген.

Еркін Медетов, дәрігер-нейрохирург:

- Мидың тамырларына жасалатын ашық оталар, ісіктері кезіндегі ашық оталар, функционалды нейрохирургия. Яғни беттің ауырсынуы, бет бұлшық еттерінің жиырылуы кезінде жасалатын оталар. Одан бөлек тамырдың ішінен барып ми тамырларының ақаулары кезінде жасалатын оталар да ангиографиялық құрылғылардың көмегімен іске асырылды.

Дәрігерлердің шипалы қолынан ел азаматтары да дертіне дауа тауып келеді. Биыл Түркістан, Қызылорда облыстары мен Ақтау, Атырау, Өскемен және Тараздан келген науқастарға жоғары технологиялық күрделі операциялар жасалды. Солардың бірі 48 жастағы Еркін Қаладинұлы. Ол бала күнінен мазалаған бас ауруынан құлан таза айыққанын айтады.

Еркін Қаладинұлы, Қызылорда облысының тұрғыны:

- Баяғыда басымның мына жері ауырып, ұстатпай, сынып жүретін еді. Қазір жақсымын. Баяғы ауруым қазір жоқ. Бесінші күні сіздің жараңызды тағы да бір қараймыз деді. Жақсы болсаңыз алтыншы күні шығара қоямын деді.

Ел азаматтарына мұндай операциялар әлеуметтік медициналық сақтандыру қоры аясында тегін жасалады. Биыл өңірде нейрохирургиялық опарациялардан бөлек, 1 жүрек және 17 бүйрек транспалантациясы сәтті өткізілді.

Сәуле Дүйсенбаева, «Әлеуметтік медициналық сақтандыру қорының» филиал директоры:

- 2025 жылы мыңнан астам жоғары технологиялық операция жасалды. Оның ішінде кардиохирургиялық операциялар, нейрохирургиялық операциялар. Сонымен қатар ағза алмастыру операциялары. Бұлардың құны өте жоғары. 10 млн-нан 77 млн-ға дейін. Бұл операциялардың барлығы әрине пациент үшін тегін.

Келер жылы нейрохирургиялық орталықта омыртқа жотасына жасалатын операцияға жаңа әдіс енгізілмек. Ашық тілікті болдырмау үшін рентген түтігі, ультрадыбыстық сорғыш және навигациялық құрылғы сатып алу жоспарланып отыр. Бұл технологиялар науқастардың тезірек сауығып, ауырсынуын азайтуға мүмкіндік береді.

Авторлары: Нұрсұлтан Мұхамеджан, Нұрмахан Бекмұратов, Нұрмахан Мұсатов