Өте мейірімді еді : Алматыда 12 жастағы жасөспірімді пышақтап өлтіріп кетті

АСТАНА, 12 мамыр – Sputnik. Алматы қаласы Түрксіб ауданында 12 жастағы баланы қатарластары бірнеше жерден пышақтап өтірді. Жаға ұстатарлық жағдай туралы Sputnik Қазақстан айтады.

Жантүршігерлік қылмыстық оқиға 10 маусымда болған. Туыстарының айтуынша, Абылайды өзінен бір жас үлкен балалар 8-9 жерден пышақтап өлтірген.

"Абылайды өзімен бірге бір мектепте оқитын 13 жастағы ұлдар 9 рет пышақтап, жауыздықпен өлтірді. Оқиға Түрксіб ауданы РВ-90 аумағында сағат 19:00 шамасында болды. Абылай - үйдің тұңғышы. Қансырап, өз үйінің дәлізінде жан тапсырды", - дейді марқұм болған баланың туысы.

Оқиға туралы қара жамылған отбасының досы Екатерина Моисеенко айтып берді. Айтуынша, Абылай өте ақ көңіл, ешқашан жанжалға араласпайтын бала.

"Біз отбасымызбен доспыз. Біздің балалар ММА жаттығуларына бірге барады. Абылай өте мейірімді бала. Полиция Абылайды өлтірген баламен хат жазысқан дейді. Мен оқиға болған кезде өз қолыммен Абылайдың телефонын ашып, бәрін көрдім. Ешбір хат жазыспаған, ешқандай телефон қоңырауы болмаған. Абылайды өлтіргенін өз көзіммен көрдім. Екінші бала Абылайды өлтіріп жатқанын көріп қашып кетті. Ол тіпті айқайлып көмекке де шақырмады", - деді Екатерина Мойсеенко.

Ал өлтірген бала шаруасын бітірген соң, қаша жөнелген.

"Бір пышақты ішіне, ал 8 рет кеуде тұсына салды. Абылай "жатақханаға барам да, қайтып келем" деген. Бала болған соң, бәрі ойнап бірге жүреді. Олар Абылайды қалай шақырды, неге шақырды, ешкім білмейді. Өлтірген балалар бір мектепте оқиды, Абылайдан бір жас қана үлкен. Олар дәлізде келе жатқан, ана бала пышақты салғанда Абылай еңкейіп қалды, сол кезде бар күшімен бірнеше рет пышақтады", - дейді отбасының досы.

Екінші бала күдікті емес, куәгер ретінде танылып отыр.

"Ал екінші бала Абылайды ұрған жоқ, пышақ сұққан жоқ деп жатыр. Бірақ көріп тұрған соң, неге көмекке шақырмады. Басында Абылайды көлік қағып кетті деп шақырған, шын мәнінде басқа жағдай болды. Абылай керегеге тақалған күйі сырғанап отырып қалған. Абылайды сөмке арқалаған ер адам көріп қалған, жедел жәрдемді сол кісі шақырған болу керек", - дейді Екатерина Мойсеенко.

Алматы қалалық полиция департаменті осы қылмысты жасады деген күдікпен Алматы қаласының 13 жастағы тұрғыны ұсталды дейді.

"Алдын ала мәлімет бойынша, күдікті мен жәбірленуші бір-бірін бұрыннан таныған. Тергеудің бастапқы деректеріне сәйкес, қайғылы оқиға кәмелетке толмағандар арасында туындаған жанжал барысында орын алған. Қазіргі уақытта күдікті арнайы мамандандырылған мекемеге орналастырылды", - дейді полицияда.

"Адам өлтіру" фактісімен қылмыстық іс қозғалды. Тергеу жүріп жатыр.

Полицияның айтуынша, баланы тәрбиелеу жөніндегі міндеттерін тиісінше орындамағаны үшін күдіктінің ата-анасы да жауапкершілікке тартылады.