Отшашуларды тек рұқсаты бар дүкендерден алу керек

Жыл сайын мереке қарсаңында ірілі-ұсақты өрт көбейеді. Бұған сапасыз пиротехника себеп, - дейді құтқарушылар. Сондықтан желтоқсанның соңына қарай арнайы рейд жүргізіліп, заңсыз саудаланып жатқан бұйымдар тәркіленеді. 

Желтоқсанның соңы қарбаласқа толы шақ. Көпшілік  мерекеде жақындарын қуанту үшін тәтті тағам, сыйлық пен отшашу алуға асығады. Кезек көп. Бірақ дәл осы пиротехникалық бұйымдар оқыс жағдайларға алып келетін жайттар аз емес.

Темірлан Айтбек, Байқоңыр ауданы Төтенше жағдайлар басқармасының инженері:

- Пиротехникалық бұйымдарды, отшашуды жарамсыз күйде қолдану, үйде немесе автомобильдерге жақын жерде қолдану, масаң күйде қолдану және балаларға беру қауіпті болып табылады. Осындай жағдайларды болдырмас үшін қазіргі таңда Астана қаласы Төтенше жағдайлар департаменті Астана қаласы Полиция департаменті қызметкерлерімен бірлесіп, жаңа жыл акциясын ұйымдастырып жатырмыз.

Қазір Астанадағы ірі сауда орталықтарының маңында пиротехникалық бұйымдар сататын 66 ресми сауда нүктесі ашылған. Ал заңсыз сауда үшін 48 хаттама толтырылып, бір мыңға тарта өнім тәркіленді.

Дәулет Қожахмет, учаскелік инспектор:

- Тек қана рұқсат етілген жерлерден сатқызылады. Оған әкімшіліктен рұқсат беріледі. Оларды тексереміз, өрт қауіпсіздігі бойынша оларда өрт сөндіру бұйымдары болуы керек. Заңсыз сатқандарға айыппұл салынады. Бірінші жолға 204 бап, бірінші тармағымен ескерту саламыз. Ол егер де қайталатын болса айыппұл салынады.

Жаңа жылда отшашу қолданғаны үшін қарапайым азаматтар да жазалануы мүмкін. Мәселен, түнгі тыныштықты бұзғаны үшін 5 айлық есептік көрсеткіш көлемінде айыппұл арқалайды. Сонымен қатар елдімекендердің аумағында пиротехника қолданғандардың жазасы төрт есе ауырлайды. Яғни 20 айлық есептік көрсеткіш. Ал тыныштық бұзған азамат 16 жасқа толмаса орнына ата-анасы немесе қамқоршысы жауап береді. Сондықтан полиция отшашуды тек ашық аумақта, қолдану нұсқаулығын сақтау керегін ескертеді.

Авторлары: Серік Селеубайұлы, Самат Қазанбаев