Өз емханаңыздағы тегін психолог: Қазақстанда қалай көмек алуға болады

Қазақстандықтар өз емханасында психолог маманға тегін жүгіне алады. Tengri Health тілшісі бұл медициналық қызметті қалай пайдалануға болатынын және пациентке қанша көмек сеансы тиесілі екенін анықтады.

Емханада маман көмегін қалай алуға болады?

Денсаулық сақтау министрлігінің Медициналық көмекті ұйымдастыру департаменті редакция сауалына берген жауабында МӘМС және тегін медициналық көмектің кепілдік берілген көлемі (ТМККК) аясында психологиялық қолдау жүйесі қалай жұмыс істейтінін егжей-тегжейлі айтып берді.

Ведомство мәліметінше, психологиялық көмек алу үшін пациент тіркелген жері бойынша учаскелік дәрігерге жүгіне алады. Көрсетілімдер болған жағдайда дәрігер оны психолог кеңесіне жібереді.

Министрлік учаскелік дәрігерге алдын ала бару кейбір жағдайларда міндетті емес екенін атап өтті. Қазақстандықтар емхана психологына қабылдау уақытында өз бетінше де жазыла алады.

Көмекке мұқтаж кәмелетке толмағандар мен жастар учаскелік дәрігердің жолдамасынсыз және тіркелген жеріне қарамастан Жастар денсаулық орталығына тікелей жүгіне алады.

Анықтама: Жастар денсаулық орталықтары (ЖДО) - 10 мен 18 жас аралығындағы кәмелетке толмағандарға және 18 бен 29 жас аралығындағы жастарға репродуктивті және ментальды денсаулық мәселелері бойынша медициналық, емдеу-профилактикалық көмек, психоәлеуметтік және заңгерлік қызметтер көрсетеді. 17 облыс пен Астана, Алматы және Шымкент денсаулық сақтау басқармаларының мәліметінше, 2023 жылдың қорытындысы бойынша есеп беру кезінде республикада жасөспірімдер мен жастарға кешенді медициналық-психоәлеуметтік қызмет көрсететін 141 Жастар денсаулық орталығы жұмыс істейді.

МӘМС бойынша психотерапияның қанша сеансын алуға болады?

Пациенттің жағдайы мен медициналық көрсетілімдеріне қарамастан, әрбір адамға кепілдік берілетін кеңестердің нақты саны белгіленбеген. Денсаулық сақтау министрлігі кездесулер саны әр пациент үшін жеке анықталатынын түсіндірді.

"Дәрігерлер бекітілген клиникалық хаттамаларға сәйкес оның жағдайын, медициналық көрсетілімдерін және тиісті көмекке қажеттілігін бағалайды", - делінген жауапта.

Психолог қабылдауын қанша уақыт күту керек?

Ведомство ақпаратына сүйенсек, Қазақстанда емхана психологтарын күтудің нақты белгіленген мерзімі жоқ. Қызметтің бұл түрі консультациялық-диагностикалық көмекке жатады және оларға жоспарлы медициналық көмек күтудің жалпы мерзімдері қолданылады.

"Ережеге сәйкес, 15 күннен артық күтуді медициналық сақтандыру қоры қателік ретінде бағалайды. Яғни, жоспарлы түрде пациент психолог кеңесін бұл мерзімнен артық күтпеуі керек", - деп түсіндірді Денсаулық сақтау министрлігі.

Қазақстанның денсаулық сақтау жүйесінде қазіргі уақытта екі мыңға жуық психолог жұмыс істейді. Оның ішінде 1 580 маман емханаларда пациенттерді қабылдайды. Мамандар тапшылығы шамамен 300 адам.

Қазақстандықтар қанша кеңес алды?

"Бірыңғай төлем жүйесі" ақпараттық жүйесінің мәліметтері бойынша:

2024 жылы психологтар МӘМС бойынша 662 557 пациентті қабылдады. Биыл 924 301 кеңес берді. ТМККК шеңберінде 539 375 адам көмек алды - оларға 752 632 кеңес жүргізілді. 2025 жылы МӘМС бойынша психологтарға 668 365 адам жүгінді. Мамандар 911 775 кеңес өткізді. ТМККК аясында 415 668 пациент көмек алды, оларға 578 703 кеңес берілді. 2026 жылдың алғашқы сегіз айында МӘМС бойынша психологтар 491 849 пациентті қабылдап, 638 649 кеңес өткізді. ТМККК бойынша 239 225 адам көмек алды - оларға 330 074 кеңес берілді.

Еске сала кетейік, Қазақстанда психологтардың мемлекеттік тізілімін жүргізу ережелері дайындалып жатыр. Бұл тізілімге кімдер кіре алатыны, қазақстандықтар мамандар туралы қандай ақпаратты көре алатыны және қандай жағдайларда оларға жұмыс істеуге тыйым салынуы мүмкін екені туралы толығырақ мына жерден оқыңыз.

Тағы оқыңыз: Қазақстанда қай жерлерде дәрігерлер жетіспейді: Денсаулық сақтау министрлігі өңірлерді атады

“Кез келген адам өзін психологпын дей алады“: Қазақстанда жаңа заң талқыланып жатыр

Бізді Google-дың негізгі дереккөздер тізіміне қосыңыз

Қосу

Психолог

науқастар

көмек

Қазақстан