Өзбекстанда электронды темекіге қарсы қатаң заң күшіне енді

Өзбекстан 1 наурыздан бастап электронды темекілердің айналымына толық тыйым салу туралы заң күшіне енді.
Енді елде вейптерді өндіру, әкелу, сақтау және сату заңсыз болып саналады.

Жаңа талапты бұзған азаматтар қылмыстық жауапкершілікке тартылады. Заң бойынша кінәлілерге бес жылға дейін бас бостандығынан айыру жазасы қарастырылған. Ал темекіні қыздыру жүйелері заңды айналымда қала береді.

Бұған дейін ведомство өкілдері мұндай шектеу енгізілмесе, жақын уақытта елдегі әрбір бесінші жас никотинге тәуелді болуы мүмкін екенін ескерткен.

Айта кетейік, 2024 жылдың сәуірінде республика Денсаулық сақтау министрлігі электронды темекілерге толық тыйым салу туралы заң жобасын қоғамдық талқылауға ұсынған. Кейін 2025 жылдың қаңтарында Өзбекстан Олий Мажилисінің Заң шығару палатасы тиісті түзетулерді қабылдап, сол жылдың сәуірінде Сенат мақұлдады.

Ал қараша айында ел президенті Шавкат Мирзиёев заңға қол қойып, құжаттың күшіне ену мерзімін үш айға кейінге қалдырған еді.