Өзбекстанда су қоры азайды

Өзбекстанның су қоры бір жылда 6,5 млрд текше метрге азайып кеткен.

Елдің су шаруашылығы министрі жағдай осылай жалғаса берсе, шаруалардың өнімі кеміп, экономикаға кері әсері тиетінін айтты. Сондай-ақ ішкі су қоймаларында жылдағыдан 2,7 млрд текше метрге кем су жиналған. Ресми Ташкент тіршілік нәрін үнемдеуге бағытталған шараларды күшейтпек. 

Биыл Өзбекстанда ауыл шаруашылығы саласына 40 млрд текше метрден астам су бағытталған. Суармалы жерлердің 60 пайызына үнемдеу технологиясы енгізілген. Ал толық қамтуға қомақты қаржы қажет.

Шавкат Хамраев, Өзбекстанның Су шаруашылығы министрі:

- Су үнемдеу технологияларын кеңінен енгізу арқылы бұл мәселені ішінара шешуге болады. Кейінгі 5 жылда Өзбекстанда суды пайдалану тиімділігін арттыру мақсатындағы жобаларға 60 трлн сум бюджет қаражаты мен 622 млн доллар шетелдік инвестиция жұмсалған. Дейтұрғанмен суармалы жерлердің 40 пайызына үнемдеу технологиясы әлі енгізілген жоқ.

Орталық Азиядағы ең ірі «Федченко» мұздығының 40%-ға жуығы еріп кеткен. БҰҰ-ның зерттеуіне сәйкес,аймақтағы су тапшылығы өңірдің экономикалық өсімін тежеп,  ауылшаруашылық өнім көлемінің азайуына алып келеді.

Ділбар Мамажонова, Өзбекстанның Олий Мәжіліс депутаты:

- Бүгінгі күнде әлемнің көптеген елінде су тапшылығы өзекті мәселеге айналды. Орталық Азияда жыл сайын тіршілік нәрінің жетіспеушілігі сезіліп жатыр. Қазір көрші мемлекеттердің жауапты мекемелері  бірігіп әрекет етуге көшті. Біз заң саласы тұрғысынан қолдауға дайынбыз.

Алдағы 10 жылда Орталық Азияда су тапшылығы қатты сезілмек. Оған аймақтағы халық санының өсуі мен климаттың өзгеруі әсер етеді. Сарапшылар қазірден бастап алдын алмаса, жағдай ушығады-деп отыр. Ал оның ең ұтымды әдісі әрине, суды мейлінше үнемдеу.