Өзбекстандағы Нұрлы жол газетіне 35 жыл толды

Өзбекстанда қазақ тілінде шығатын «Нұрлы жол» газетіне 35 жыл толды. 1991 жылдың қаңтар айында жарық көрген баспаның алғашқы атауы «Достық туы» болған. 

Шығармашылық ұжым оқырмандарын елдегі қоғамдық-саяси өмірден, әлеуметтік мәселелер мен мәдени жаңалықтардан хабардар етеді. Қандастардың тыныс-тіршілігін де назардан тыс қалдырмайды. 

«Нұрлы жол» газеті бастапқыда 21 мың тиражбен шыққан. «Ол кезде оқырманның талғамымен талабы басқаша еді», - деп еске алады мұндағылар. Қазір заман өзгерді. Ақпараттық технология дамыған тұста, газеттің шынайы оқырмандары ғана қалған. Газет ұжымы тираж санын көбейтуге ынталы. Егемен Қазақстан басылымымен тығыз байланыс орнатып, материалдарымен бөлісіп тұрады.

Ғұламзәкір Жүсіпов, «Нұрлы жол» газетінің бас редакторы:

- Егемен Қазақстан газетімен байланыс бар. Тілшілеріміздің материалдары шығып тұрады. Біз де әріптестердің мақаласын басып шығарамыз. Екі ел достығын нығайтуға әрекет жасаймыз.

Мерзімді басылымның шығармашылық ұжымы негізінен қазақ тілі мен әдебиеті мамандарынан жасақталған. Қазақстандағы іргелі университеттерді тәмамдаған бірқатар журналистер де бар. Солардың бірі – бас редактордың орынбасары Қатира Нұрбаева. Әріптесіміз газет шыққан алғашқы күннен бастап осы жерде еңбек етеді.

Қатира Нұрбаева, «Нұрлы жол» газеті бас редакторының орынбасары:

- Қазақтар үшін газет болсын деп ашқанменен алғашқыда жағдай болмады. Қазақша әріптер болмады. Алғашқы нөмірлері Шымкентте басылды. Сөйтіп осы жаққа жеткізіліп таратылған.

Газет ұжымы бір кездері Өзбекстандағы қазақ оқулықтарын дайындауға атсалысқан. Әсіресе жаратылыстану бағытындағы пәндер сауатты аударылып, өскелең ұрпаққа ұсынылған.

Гүлжамал Байтөреева, «Нұрлы жол» газетінің бөлім меңгерушісі:

- Қазақ мектептеріне барсақ, бізді танып жатады. Соның барлығы осы жерде еңбектеніп жүрген ағай апайлардың арқасы деп білемін. Осы жерге үйреніп қалдық. Күнде таңертең жұмысқа келгім келеді. 

«Нұрлы жол» газетінің қазіргі тиражы 5 мыңдай. Баспа толықтай үкіметтен қаржыландырылады. Газеттің 35 жылдығын кең көлемде атап өту жоспарланып отыр.