Өзгенің қайғысын реалити шоуға айналдырған заман: әлеуметтік желі біздің ойлау жүйемізді қалай өзгертіп жатыр?

Жазушы әрі саясаттанушы Бақытжан Бұқарбай әлеуметтік желідегі қайғылы жағдай, біреудің ауру-сырқауы немесе қайғы-қасіретін көрсетіп, қаралым жинап, табыс табудың құралына айналған үрдісті сынға алды, - деп хабарлайды Aikyn.kz. 

Оның айтуынша, Қазақстан ел болып қалыптасқалы сындарлы сынақтан өтіп, өзінің мемлекеттігін, тәуелсіздігін сақтап қалды. Сондықтан бүгінде ел өзін әрқашан құрбан ретінде көрсетудің қажеті жоқ. 

«Біз тарихи күресте шыңдалдық, барлық жауды жеңіп, тәуелсіздікке қол жеткіздік. Бүгінде жоңғарлар қайда, біз қайдамыз. Қазір еліміздің сыртқы дамуына кедергі келтіретін негізгі факторлар жойылды», – деді Бақытжан Бұқарбай.

Саясаттанушының айтуынша, соған қарамастан кейбір блогерлер мен медиа тұлғалар – адамдардың қайғы-қасіретін әдейі дәріптеп, елдің назарын аударудың құралына айналдырып келеді. Мұндай жағдай көбіне өзгенің қасіретін қаралым жинау үшін, жазылушының санын көбейту үшін  және табыс табудың амалы ретінде пайдаланатын өзіндік «реалити-шоуға» айналып жатыр. 

Сарапшының пікірінше, мұндай әрекет этикалық ұстанымды бұзып қана қоймай, қоғамдық санаға да кері әсер тигізуде. Себебі шынайы жанашырлықтың орнын коммерциялық мүдде басып кеткен. 

Бақытжан Бұқарбайдың айтуынша, контент пен табыс табу мақсатында адамдардың қайғы-қасіретін алыпсатарлыққа айналдыру – азаматтардың ойлау жүйесін бұзады, шынайы көмек көрсету мәдениетін әлсіретіп,  мұндай құбылысқа мемлекет деңгейінде қатаң тосқауыл қойылуы қажет.