Өзінен жасы кіші хоккейшіні өлтірген спортшыға апелляциялық сот үкім шығарды

АСТАНА, 10 желтоқсан - Sputnik. Өскеменде хоккейшінің өліміне қатысты қылмыстық іске апелляциялық сот үкім шығарды, деп хабарлайды Шығыс Қазақстан облыстық соты.

Оқиға былтыр 2 тамызда шамамен сағат 14:50-де болған. "Торпедо" ересектер хоккей командасының ойыншысы "Спорт сарайында" кіші хоккей командасының ойыншысымен жанжалдасып қалған.

"Ересек хоккейші сол қолымен өзінен кіші спортшының мойнынан ұстап, оған 7 900 теңгеге сатып алынған желдеткіш үшін ақша қайтаруды талап еткен. Ол желдеткішті соның алғанына сенімді болған. Осылайша ол даулы "құқығын" өз бетімен жүзеге асыра бастаған", - дейді ведомстводағылар.

Алайда жасы кіші хоккейші ақша қайтарудан бас тартқан. Сотталушы жәбірленушінің желке тұсынан қысып ұстаған. Куәгерлер ажыратуға тырысады. Бірақ жәбірленуші сол жерде есінен танып құлаған.

"Салдарынан жәбірленушіге мойынның рефлексогенді аймағының жабық доғал жарақаты келтіріліп, ол жүрек қызметінің рефлекторлық тоқтауына және кейіннен оның өліміне әкеп соққан", - дейді соттағылар.

Апелляциялық сот бірінші сатыдағы соттың шешімін өзгертіп, сотталушы үш жылға бас бостандығынан айырылды.

Сондай-ақ ақ жәбірленуші тарапқа 20 000 000 теңге көлемінде моральдық өтемақы өндірілді.