Пара ретінде көлік дөңгелектерін алған: Арқалықта полиция қызметкері мен жергілікті тұрғын сотталды

Арқалық қалалық соты (Арқалық, Қостанай облысы) қылмыстық істі қысқартылған тәртіпте қарады. Сот материалдарына сәйкес, жол-патрульдік полиция взводының аға инспекторы Арқалық қалалық полиция басқармасында қызмет етіп жүріп, 126 мың теңге тұратын автокөлік шиналары түрінде пара алған.

Бұған дейін Арқалық тұрғыны мас күйінде көлік жүргізгені үшін кінәлі деп танылып, жеті жылға көлік басқару құқығынан айырылған. Кейін ол көлікті табыс табу және қала ішінде жүру үшін қажет екенін айтып, полицейден көмек сұраған.

Іс материалдарына сәйкес, полицей бастапқыда бас тартқанымен, кейін жаңа шиналар әкелуді талап еткен. 2025 жылғы 7 сәуірде тұрғын банк арқылы бөліп төлеу рәсімдеп, төрт жазғы шина сатып алып, оларды полиция қызметкеріне берген.

Одан кейін полицей көлік суретін жіберуді сұрап, оны WhatsApp мессенджеріндегі патрульдік полиция қызметкерлері бар топтық чатқа жолдаған. Сот дерегінше, бұл чатқа туыстары немесе таныстары бар адамдарға байланысты тоқтатылмайтын көліктердің суреттері жіберіліп отырған.

Сот 2025 жылғы сәуір–қазан аралығында жүргізуші көлік жүргізу құқығынан айырылғанына қарамастан, полицейдің «қамқорлығымен» Арқалықта еркін жүргенін анықтады.

Тінту барысында полицейдің үйінен 11 оқ-дәрі табылды. Сараптама қорытындысына сәйкес, олардың 10-ы Макаров және Стечкин тапаншаларына арналған 9 мм оқ, біреуі 12 калибрлі аңшылық патрон болған және бәрі жарамды деп танылды.

Екі сотталушы да кінәсін толық мойындап, өкініш білдірді. Сот жеңілдететін жағдайлар ретінде кінәні мойындау, өкіну және кәмелетке толмаған балаларының барын ескерді. Нәтижесінде бұрынғы полиция қызметкері пара алғаны және заңсыз оқ-дәрі сақтағаны үшін кінәлі деп танылды. Ол мемлекеттік қызметте өмір бойы жұмыс істеу құқығынан және полиция капитаны атағынан айырылды. Сондай-ақ 4 млн теңге айыппұл салынды.

Екінші айыпталушы пара бергені үшін кінәлі деп танылып, 1,89 млн теңге айыппұл төлеуге және заңсыз алынған мүлікті — төрт шинаны мемлекет кірісіне өткізуге міндеттелді.

Оқ-дәрілер жойылуға жатады. Үкімге апелляциялық шағым түсіруге болады.