Ақтөбеде мердігерлерден пара алған басшы сотталды

Қылмыстық іс Шалқар аудандық сотында қаралды. Шілде айында басталған сот отырысы 4 айға созылып, бүгін үкім шықты.

- Шұға Сәдуақасова Қылмыстық кодекстің 366-бабы 3-бөлігі 1,4-тармақтары бойынша кінәлі деп танылып, 7 жылға бас бостандығынан айырылсын. Жазаны қылмыстық атқару жүйесінің орташа мекемесінде өтеу белгіленсін. Сотталған Сәдуақасовадан параның қалған бөлігі ретінде алынған 2 млн 250 мың теңге мемлекет кірісіне өндірілсін. Ал 6 500 000 мың теңге сот үкімі күшіне енген соң мемлекет кірісіне аударылсын. Оның құрбысының банк шотындағы 5 млн теңге сот үкімі заңды күшіне енген соң мемлекет кірісіне берілсін, - деді судья Сұлушаш Махамбетова.

Сонымен бірге Шалқар ауданындағы мемлекеттік қызметшілер арасында пара алу дерегінің көбеюіне байланысты Ақтөбе облысының әкіміне жеке қаулы шығарды.

Еске салсақ, Шалқар аудандық сәулет, құрылыс және қала құрылысы бөлімінің басшысы екі мердігерден миллиондап пара алғаны үшін айыпталды. Бірі су желілерін қайта жаңғырту, екіншісі тұрғын үйге инженерлік инфрақұрылым тарту жобаларының мердігері.

Сотталушы Шұға Сәдуақасова өз жауабында ақшаның бір бөлігін әкімге бергенін айтты. 

Сот жарыссөзі кезінде прокурор пара алу ісінде облыс әкімі атына жеке қаулы шығаруды, сотталушыны 7 жылға бас бостандығынан айыруды сұрады.