Павлодарда дрон шығаратын бірлескен кәсіпорын ашылады

Павлодарда  ұшқышсыз ұшу аппараттарын жасап шығаратын қазақ-корей бірлескен кәсіпорыны ашылады.

Осындай келісімге Оңтүстік Кореяда қол қойылды. «Қазақстанда жасалған» деген жазуы бар дрондар қандай болады және олар қашан қолданысқа беріледі? 

Павлодарда дрон өндіретін бірлескен кәсіпорын ашу туралы келісімге қазақстандық және оңтүстіккореялық компаниялар қол қойды. Кәріс компаниясының сегіз жылдық тәжірибесі бар және  дрондарды жобалау, құрастыру, оларға арналған бағдарламалық қамтамасыз етуді әзірлейтін Оңтүстік Кореядағы жалғыз кәсіпорын. Бұл компанияның дрондарын Оңтүстік Корея армиясы пайдаланады, сондай-ақ олар Африка мен Оңтүстік-Шығыс Азия елдерінің әскери-теңіз күштеріне жіберіледі. Енді осындай дрондар Павлодарда да шығарылмақ.

Ли Чон Гён, дрон өндіретін компания президенті

- Қазақстан — кең аумақты, бай ресурстарға ие ел. Мұндай дрондар тек қорғаныс мақсатында ғана емес, сонымен қатар мониторинг, картография, ауыл шаруашылығы және логистика үшін де қажет. Қазақстанда өндірілген дрондарды ел ішінде ғана емес, сондай-ақ Орталық Азия, Шығыс Еуропа және басқа өңірлерге де экспорттауға болады. Қазақстан дрон экспортының аймақтық орталығына айнала алады.

Оңтүстік кореялық компания 2-ден 25 келіге дейінгі салмақтағы 12 түрлі дрон шығарады. Павлодардағы зауыт алғашқы кезеңде екі модельдің өндірісін бастауды жоспарлап отыр. Пилоттық жоба ретінде мына барлау дроны таңдалған.

Владислав Цой, тілші:

- Бұл дрон жергілікті аумақты бақылауға арналған. Орнатылған камераның арқасында орман мен құбырларды күзетуге, сондай-ақ адамдарды іздеуге қолданылады. Салмағы 24 килограмм, қуаттан ажырамай шамамен үш сағат ұша алады.

Ержан Әуезов, дрон өндіретін компанияның негізін қалаушы:

- Биылғы жылдың соңына дейін өндірісті іске қосуды жоспарлап отырмыз. Қажетті жабдықтың бір бөлігі сатып алынды, қалғанын күтіп жүрміз. Сонымен қатар, Павлодарда Ақпараттық технологиялар колледжі және Кореяның (J University) Джей университетімен бірлесе отырып, ұшқышсыз әуе жүйелері саласында мамандар даярлап жатырмыз.

Бастапқы кезеңде Павлодардағы дрон өндіретін кәсіпорында 4-5 адам жұмыс істейді. Ал оларды оқытумен және өндірістік процестерді жолға қоюмен серіктес кәріс компаниясының өкілі айналысады. 

Владислав Цой, Ольга Лян