Пентагон Иранға қарсы әскери операцияны жалғастыру үшін 200 млрд доллар сұрап отыр

The Washington Post басылымының мәліметінше, Пентагон Ақ үйге Конгреске 200 млрд доллардан астам қаражат бөлу туралы өтініш жолдауға рұқсат сұрап жүгінген. Алайда кейбір шенеуніктер бұл бастаманың заң шығарушылар тарапынан қолдау табу ықтималдығы төмен екенін айтады.

Болжамды сома қазіргі әуе операциясына жұмсалып жатқан шығындардан едәуір асып түседі. Негізгі қаржы соңғы үш аптада мыңдаған нысанаға жасалған соққылар барысында пайдаланылған қару-жарақ қорын шұғыл толықтыруға бағытталмақ.

Басылым дереккөздеріне сүйенсек, соңғы екі апта ішінде Қорғаныс министрлігі қаржыландырудың бірнеше нұсқасын ұсынған. Алайда сұралатын қаражаттың нақты көлемі әлі түпкілікті бекітілмеген.

Бұл бастама АҚШ Конгресі ішінде елеулі саяси келіспеушіліктерге себеп болуы мүмкін. Қоғамдық қолдау деңгейі де шектеулі күйде қалып отыр. Демократиялық партия өкілдері ұсынысты қатаң сынға алса, Республикалық партия жалпы қосымша қаржыландыру идеясын қолдайды. Дегенмен олар Сенаттағы қажетті дауыс санын жинау тетіктері бойынша ортақ ұстанымға әлі келген жоқ.

Бұған дейін АҚШ президенті Дональд Трамп сайлауалды науқан кезінде елдің шетелдік қақтығыстарға қатысуын қысқартуға ниетті екенін айтып, Украинаға бөлінетін қаржы шығындарын сынға алған болатын. Америкалық деректерге сәйкес, желтоқсан айына қарай Конгресс бұл мақсаттарға шамамен 188 млрд доллар бөлуді мақұлдаған.

АҚШ Қорғаныс министрлігі бұл мәселеге қатысты түсініктеме беруден бас тартты. Ал Ақ үй өкілдері әзірге БАҚ сауалына жауап қайтармаған.

Еске салайық, 28 ақпанда АҚШ пен Израиль Иранға қарсы операция бастаған еді. Ақ үй бұл қадамды Иран тарапынан төнген зымыран және ядролық қауіппен байланыстырды. Бұған жауап ретінде Ислам революциясы сақшылар корпусы Израиль аумағындағы және аймақтағы америкалық нысандарға соққы жасаған.

Ақ үйдің Экономикалық кеңесі басшысының мәлімдеуінше, АҚШ-тың Иранға қарсы әскери әрекеттерге жұмсаған жалпы шығыны қазіргі таңда 12 млрд доллар шамасында. Пентагон дерегіне сәйкес, операцияның алғашқы екі күніндегі соққылардың өзі америкалық салық төлеушілерге 5,6 млрд долларға түскен.