Петропавлда түлектер жұмыспен қамтылады

Петропавлда жоғары оқу орны түлектері толық еңбекпен қамтылады. Бұл жөнінде жергілікті университет 150 кәсіпорынмен келісім-шарт жасасты.

Ол бойынша студенттер өндірістік тәжірбиеден өтіп, диплом алған соң бірден жұмысқа қабылданады.

Қайнар Мұртаев 4-курста оқиды. Келесі жылы дипломы қолына тиетін студент қазір мамандығы бойынша зауытта инженер-құрастырушы боп өндірістік тәжірбиеден өтіп жүр. Кейін осында жұмыс істемек.

Қайнар Мұртаев, студент:

- Университет пен кәсіпорын өзара әріптестік жөнінде меморандумға тұрған. Сондықтан оқу мен жұмысты қатар алып жүруге мүмкіндік туды. Бұл студенттер үшін өте ыңғайлы.

Бұл зауытта 120 студент жұмыс істейді. Кәсіпорынның жеке колледжі бар. Одан бөлек олар жергілікті жоғары және техникалық-кәсіптік оқу орындарымен келісімге отырып, кадр даярлау ісін бірлесе жүзеге асырып жатыр.

Пётр Шарапаев, кәсіпорын директоры:

- Қазір инженерлерді даярлауға басымдық беріп жатырмыз. Бұл жөнінде университетпен келіссөздер жүргізіп, оқу орнында бөлек орталық ашуды ұсындық. Бірлескен жоба кадр тапшылығы мәселесін шешуге мүмкіндік береді.

Петропавлдағы университетте 6,5 мың студент білім алады. Жоғары оқу орнының басшылығы оларды жұмыспен қамту үшін түрлі салада 150 кәсіпорынмен меморандумға келді. Оның ішінде дуалды білім беру жүйесі де бар.

Ербол Исақаев, университет ректоры:

- Біз дуальді білім беру жүйесінің жаңа моделін іске қостық. Ол бойынша колледж түлектері немесе екінші жоғары білім алғысы келетін адамдар жұмыс істеп жүріп оқи алады. Оқу бағдарламасы екі жыл. Бұл еңбек нарығын сапалы кадрлармен қамтуға септігін тигізеді.

Оқу орны АҚШ-тың Аризона университетімен бірлесе қосдипломды білім беру бағдарламасын жүзеге асырды. Қазір 30-дан аса студент биотехнология және IT мамандығы бойынша шетелде соңғы курста оқып жатыр.

Авторлары: Айдарбек Айтмұхамбетүлы, Қуаныш Қазбеков