Жастар жұмыспен қамтылады

Осы мақсатта жүзеге асып жатқан «Жастар практикасы», «Алғашқы жұмыс орны», «Ұрпақтар келісімшарты» секілді бағдарламалар жас мамандарға еңбек нарығына сенімді қадам басуға мүмкіндік беруде. Бүгінде мегаполисте 2 мыңнан астам жас осы жобалар арқылы алғашқы еңбек тәжірибесін жинап, болашағын қалыптастырды.

Жастарды қолдауға бағытталған мемлекеттік бастамалардың жемісті мысалы ретінде Малика Мұсаходжаеваның тәжірибесін атап өтуге болады. Ол биыл Шымкент политехникалық колледжін «тоқушы-оператор» мамандығы бойынша аяқтап, enbek.kz электронды биржасында жұмыссыз ре­тінде тіркелген. Қысқа уақыт ішінде «Назар Текс­тиль» кілем фабрикасынан жұмыс ұсынысын алып, «Жастар практикасы» бағдарламасы аясында кәсіпорында зат белгі операторы ретінде еңбек жолын бастады. 

«Фабрикада мен сияқты жастар көп. Күн сайын ор­тақ мақсатпен жұмыс істейміз, тәжірибе жинаймыз. Ең бастысы – бағдарлама арқылы жалақы аламыз. Практика аяқталған соң осы жерде тұрақты қалып жұмыс істегім келеді», – дейді жас маман Малика Мұсаходжаева.

Жастарды еңбекке бейімдеу – Қазақстанның кадрлық әлеуетін нығайтудың стратегиялық маңызы бар бағыт. Жаңа мамандарға тәжірибе беру, олардың кәсіби қабілетін дамыту бүгінгі еңбек нарығының талабына сай жүйелі жүргізілуде. Ресми деректер бойынша Шымкент қаласында бүгінде «Жастар практикасы» жобасымен – 1 682 жас, «Алғашқы жұмыс орны» бағдарламасы бойынша – 352 жас түрлі мекеме мен өндіріс орындарында еңбек етіп жүр.

Жалпы, бағдарламалар жас түлектерге алғашқы тәжірибесін алу ғана емес, тұрақты жұмысқа орналасуға жол ашады. Жұмыс берушілер үшін де мұндай жоба тиімді, себебі олар жас мамандарды өз өндірісінде байқап, біліктілігіне баға беру мүмкіндігіне ие болады. Мамандардың айтуынша, бұл бастама – нарықта жаңа буын, бәсекеге қабілетті кадрлардың қалыптасуына жол ашатын маңызды қадам. 

Шымкент  жастар қаласы. Қалада жас буынға сенім беріліп, еңбек жолын бастауға барлық мүмкіндік жасалып келеді. Мемлекеттік жастар саясатының нәтижесінде мыңдаған жас маман өз жолын табуда. «Жастар практикасы» секілді бағдарламалар тек уақытша жұмыс емес, ертеңге нық қадам, болашақ мамандық жолындағы бастау болып отыр.

Назгүл НАЗАРБЕК,

Түркістан облысы