Полиция мен банк 3,6 миллион теңгенің заңсыз аударылуына жол бермеді

Қостанайда полиция қызметкерлері мен банк өкілдерінің бірлескен жедел әрекетінің арқасында 3,6 миллион теңге көлеміндегі қаржының заңсыз түрде шетелге аударылуының алдын алу мүмкін болды, – деп хабарлайды Aikyn.kz сайты.

Белгілі болғандай, телефон алаяқтарының арбауына түскен қарт ерлі-зайыпты жұп өз қаражатын Қазақстан Республикасынан тыс орналасқан шетелдік есепшотқа аудармақ болған. Алаяқтар классикалық психологиялық қысым әдістерін қолданған: қорқыту, асықтыру, жалған қауіп төндіру, сондай-ақ «қауіпсіз шоттар» мен «депозиттерге» ақша аудару қажеттігі туралы ойдан шығарылған сылтауларды пайдаланған.

Бірақ банк қызметкерлері күмәнді әрекетті дер кезінде байқап, полицияға хабар берген. Құқық қорғау органдары жедел түрде іске кірісіп, ақша аударымын тоқтатты. Нәтижесінде азаматтардың қаржысы сақталып, оларға қажетті түсіндіру жұмыстары жүргізілді.

Мамандардың айтуынша, мұндай жағдайлар соңғы уақытта жиілеп барады. Телефон алаяқтары өздерін банк, полиция немесе мемлекеттік орган қызметкерлері ретінде таныстырып, адамдарды алдауға тырысады.

Осыған байланысты құқық қорғау органдары азаматтарға тағы да ескертеді:
– банк, полиция және мемлекеттік органдардың қызметкерлері ешқашан ақша аударуды талап етпейді;
– SMS-кодтарды, банк карталарының деректерін және шот мәліметтерін сұрамайды;
– «қауіпсіз», «резервтік» шоттарға немесе «депозиттерге» ақша бағыттауды ұсынбайды.

Егер күмәнді қоңырау түссе:
– әңгімені бірден тоқтатыңыз;
– берілген нұсқауларды орындамаңыз;
– дереу банкке және полицияға жүгініңіз.

Құзырлы органдардың мәлімдеуінше, полиция мен қаржы ұйымдарының бірлескен жұмысы – азаматтарды интернет және телефон алаяқтарынан қорғаудың ең тиімді жолы болып қала береді.