240 миллион теңгенің даулы ойынын ҰҚК мен ЭТД тексеріп жатыр

Ғылым және жоғары білім министрлігі әзірлеуіне 240 миллион теңгеге жуық қаражат жұмсалған Steppe Rider видеоойынын тексеруді бастады. Бұл туралы бүгін Үкіметте өткен брифингте ведомство басшысы Саясат Нұрбек айтты, деп хабарлайды Tengrinews.kz тілшісі.

Министрге "ведомствоның жоба нәтижесіне көңілі тола ма және дайын ойынның бастапқы техникалық талаптарға сәйкестігі тексерілді ме?" - деген сұрақ қойылды.

"Аталған дерек бойынша біз ҰҚК Сыбайлас жемқорлыққа қарсы іс-қимыл қызметі мен Астана бойынша Экономикалық тергеу департаментіне тексеріс жүргізу туралы сауал жолдадық. Бұған өзіміз бастамашы болдық", - деп жауап берді Саясат Нұрбек.

Министрдің айтуынша, қазіргі уақытта тексеріс шаралары жалғасып жатыр.

"Одан әрі, бәлкім, сот тәртібімен немесе әкімшілік іс жүргізу аясында қандай да бір шешім қабылданады. Бұл - тексеруші органдардың құзырындағы шаруа. Тиісті сауалды өзіміз дайындап, жолдадық", - деді ол.

Бұл ретте министр ведомствоның әзірлеме нәтижесіне қатысты пікірін және шыққан ойынның техникалық ерекшеліктердегі барлық тармаққа сәйкестігі туралы сұраққа нақты жауап бермеді.

2025 жылдың наурызында Ғылым және жоғары білім министрлігі қазақ тілін үйренуге арналған балалар компьютерлік ойынын әзірлеуге конкурс жариялаған болатын. Жобаға шамамен 242 миллион теңге жұмсау жоспарланған еді. Сәуірде министрлік "United Kingdom" ЖШС-мен 239,8 миллион теңгеге келісімшарт жасады. Соңғы мәліметке сәйкес, мердігерге шартта көрсетілген барлық сома төленген.

Техникалық ерекшеліктерге сәйкес, мемлекет қадамдық стратегия немесе RPG жанрындағы білім беру ойынын алуды көздеген. Онда сюжет, диалогтар, миссиялар, түрлі локация, ілгерілеу жүйесі және қазақ тілін үйренуге арналған тапсырмалар болуы тиіс еді.

Алайда 2025 жылдың желтоқсанында пайдаланушыларға раннер жанрындағы Steppe Rider ұсынылды. Онда ойыншы үш жолақпен қозғалып, кедергілерден өтетін және әріптерді жинап, қазақша сөздер құрайтын кейіпкерді басқарады.

Ойын индустриясының мамандары дайын өнімде бастапқы техникалық тапсырмада көрсетілген көптеген элемент жоқ екеніне назар аударды. Атап айтқанда, сарапшылар толыққанды сюжетті, пысықталған диалогтарды, әртүрлі локация және тіл үйретудің жүйелі әдістемесін таба алмады.

Бұл ретте Ғылым және жоғары білім министрлігінің Тіл саясаты комитеті бұған дейін дайын ойынның техникалық ерекшеліктерге сәйкес келетінін мәлімдеген болатын.

Google News арқылы жаңалықтарымызды қадағалаңыз