Премьер Министр Астанадағы өрт сөндіру техникасын жасайтын зауытқа барды

Әсіресе, өндірістік әлеуетті нығайтуға, заманауи технологиялық шешімдерді енгізуге баса назар аударылған. Премьер-министрге өндірістік циклдің негізгі аймақтары таныстырылды. Қазіргі уақытта шығарылатын өнім түрлерін кеңейтуге және жерсіндіру деңгейін арттыруға бағытталған өндірістік желілерді дамыту жұмыстары жүруде.

Елордада өнеркәсіп кәсіпорындарының негізгі бөлігі №1 Индустриялық парк аумағында шоғырланған. Өндірістік портфель жалпы құны 333,3 млрд теңге болатын 137 жобаны қамтиды, онда 9,5 мыңнан астам жұмыс орны қарастырылған.

Премьер-министр «Автокомпоненты KZ» ЖШС өрт сөндіру және арнайы техника мен аспалы жабдықтар өндіретін зауытының қызметімен танысты. Кәсіпорын 2025 жылдың қаңтар айында іске қосылған. Жоба кәсіпкерлікті дамыту қорының қолдауына ие болған және 5,1 млрд теңгеден астам жеке қаражат бөлінген.

Өндіріс директоры Александр Плужников зауыттың жобалық қуаты жылына 400 техникаға дейін жететінін хабарлады. Оның ішінде өрт сөндіру автоцистерналары, вахталық фургондар және коммуналдық-жол машиналары бар. Өнімдер Төтенше жағдайлар министрлігінің, коммуналдық қызметтердің және өзге де құрылымдардың қажеттіліктері үшін жеткізіледі. 2026-2028 жылдары қызметкерлер санын кезең-кезеңімен 200 адамға дейін арттыру жоспарланған.

Олжас Бектенов отандық машина жасау саласын индустрияландырудың және еңбек өнімділігі жоғары жұмыс орындарын құрудың негізгі драйверлерінің бірі ретінде дамытудың маңыздылығын атап өтті.

– Өңдеу өнеркәсібінің өсуі экономиканы әртараптандыруға және отандық өндірістің бәсекеге қабілеттілігін арттыруға тікелей әсер етеді. Президент Қасым-Жомарт Тоқаев Үкіметтің кеңейтілген отырысында атап өткендей, біз ел ішінде көбірек өнім өндіруіміз керек, нақты секторды нығайтып, тұрақты жұмыс орындарын құру қажет. Үкімет өз тарапынан өндіріс пен локализациялауды қамтамасыз ететін кәсіпорындарға инфрақұрылым, кадрларды даярлау және нақты тапсырыс тетіктері арқылы қолдау көрсетеді. Нәтиже неғұрлым көбірек өнім шығаруға, көбірек жұмыс орнын құруға және жоғары сапаға негізделуі керек, — деп атап өтті Олжас Бектенов.

Сапар қорытындысы бойынша, Премьер-министр өнеркәсіптік базаны дамытуға және цифрлық инфрақұрылымды нығайтуға бағытталған жобаларды жүзеге асыруды жалғастыруды тапсырды.

Бұған дейін Премьер-министр табиғи газбен жұмыс істейтін ЖЭО-3-тің негізгі жабдықтарын қарап шыққан еді.