Президент: Билік пен бизнес өкілдері мәселенің шешімін бірлесе отырып іздеуі қажет

Фото: Ақорда

Мемлекет басшысының айтуынша, «Халық үніне құлақ асатын мемлекет» қағидаты бүгінде нақты іс жүзінде жүзеге асырылып келеді. Сонымен қатар елде инвестициялық дауларды шешуге қолайлы құқықтық және институционалдық орта қалыптасып жатыр.

«Осының бәрі «Халық үніне құлақ асатын мемлекет» қағидатының нақты іс жүзіндегі көрінісі екені күмәнсіз. Еліміз сот жүйесі және құқық қорғау саласындағы түбегейлі реформалармен қатар ауқымды экономикалық өзгерістерді жүзеге асырып жатыр. Мұның мемлекетіміз үшін маңызы айрықша. Іскерлік белсенділікті арттыру мақсатында, соның ішінде инвестициялық дауларды шешу үшін қолайлы құқықтық институционалдық орта қалыптасуда. Соның арқасында сот шешімдерінің 80 пайызына жуығы инвесторлардың пайдасына шығарылып жатыр», деді Қасым-Жомарт Тоқаев.

Мемлекет басшысы: Еліміздегі сот тәжірибесі үшін де бетбұрыс кезеңі басталды

Президент отандық және шетелдік инвесторлармен кездесулерде билік пен бизнес өкілдерінің өзара ашық байланыс орнатуы маңызды екенін айтты.

«Мен отандық және шетелдік инвесторлармен кездесулер кезінде үнемі мына мәселеге айрықша назар аударамын: билік және бизнес өкілдері өзара сындарлы байланыс орнатуы керек, олар өзекті түйткілдерді ашық талқылап, шешу жолдарын бірлесе отырып іздеуі қажет. Билікте отырған лауазымды тұлғаларға тапсырмам: әр даулы жағдайда мәмілеге келетін жолды іздеу керек, бірақ бұл жол заңнама жүйесіне нұқсан келтірмеуі қажет. Басқа сөзбен айтқанда, әр келісімнің заңдық шектеуі болуға тиіс. Атап айту керек, кассациялық соттарды құру бастамасы дәл осындай жиынның бірінде көтерілген болатын», Президент.

Еске сала кетейік, бүгін Мемлекет басшысы жаңа Конституция ережелерін жүзеге асыру мақсатында бес конституциялық заңға қол қойды.