Президент: Біз Қазақстанды үлкен құрылыс алаңына айналдыруымыз керек

Президент Қасым-Жомарт Тоқаев инфрақұрылымның ауқымды құрылысы ел үшін басты міндеттердің біріне айналуы тиіс екенін мәлімдеді. Оның айтуынша, ірі жобаларды дамыту Қазақстанның экономикалық өсімінің негізі болады, - деп хабарлайды Tengrinews.kz.

Президент Қасым-Жомарт Тоқаев инфрақұрылымның ауқымды құрылысы ел үшін басты міндеттердің біріне айналуы тиіс екенін мәлімдеді. Оның айтуынша, ірі жобаларды дамыту Қазақстанның экономикалық өсімінің негізі болады, - деп хабарлайды Tengrinews.kz.

Парламент палаталарының бірлескен отырысында сөйлеген сөзінде Мемлекет басшысы елге инфрақұрылым және өнеркәсіп нысандарының құрылыс қарқынын жеделдету қажет екенін атап өтті.

"Жалпы, біздің алдымызда аса маңызды, өте жауапты және шұғыл міндет бар: бұл – кең ауқымды құрылыс жүргізу. Елімізде неғұрлым құрылыс көп болса, Қазақстан да соғұрлым өркендей береді. Ең алдымен, бұл – негізгі инфрақұрылымға қатысты мақсат. Біз теміржолдарды, автожолдарды, әуежайларды, вокзалдарды, сумен қамтамасыз ететін ірі құрылғыларды, өндіріс және өнім кәсіпорындарын, қала ғимараттарын және тағы басқа нысандарды жоғары қарқынмен салуымыз керек", - деді Тоқаев.

Сонымен қатар Президент Қазақстан тек бюджет қаражатын үлестіретін мемлекет моделімен дами алмайтынын атап өтті.

"Әлеуметтік мемлекет боламыз деп, қаражатты талан-таражға салуға болмайды. Осындай қысқа, шолақ ойлы саясатты біздің ұрпақтарымыз түсінбейді де, кешірмейді де", - деді Президент.

Тоқаевтың айтуынша, елге жасампаздық пен ауқымды жобаларды іске асыруға баса назар аудару қажет.

"Басқа сөзбен айтқанда, Қазақстанды үлкен құрылыс алаңына айналдыруымыз керек", - деді ол.