Президент Конституцияға қатысты өз ойымен бөлісті

Егер болашақта Конституцияға қандай да бір өзгерістер, тіпті, шағын өзгерістер енгізу керек болып жатса, ондай қадамды тек референдум арқылы ғана жасауға болады. 

Бүгін Президент волонтерлер форумында Ата заңға қатысты өз ойымен бөлісіп, барлық жаңашылдықтар халықпен бірге келісіп, шешілуі керек деді. Қазір комиссия Конституцияға қатысты ұсыныстың бәрін мұқият саралап шыққан. Түзетулер Ата Заңның барлық негізгі бөлімдері мен баптарын, Преамбуласын түгел қамтитын болады. Бір сөзбен айтқанда жаңа Конституция қабылдау ұсынысы айтылып жатыр. Президент елдің басты құжатында гуманитарлық құндылықтарды қалыптастыру маңызды деп санайды. Комиссия мүшелері ұсынған заңнамалық ережелерде адам құқықтары бәрінен жоғары тұратыны және адам капиталы ең қымбат құндылық екені айқын көрсетілген.

Қасым-Жомарт Тоқаев, Қазақстан Республикасының Президенті:

- Кешегі отырыстағы пікірталаста Комиссия мүшелері «Ата Заңға енгізілетін өзгерістер ауқымына қарасақ, жаңа Конституция қабылдауымыз керек» деген байлам жасады. Шын мәнінде, ұсынылған түзетулер жобасы елді институционалдық-құқықтық тұрғыда жаңғыртумен ғана шектелмейді. Сонымен бірге бұл қадам тұтас мемлекеттік жүйені қайта түзуге жол ашады. Түбірімен өзгерген мүлдем жаңа құжаттың бейнесі қалыптасты. Ата Заңымызда жарқын болашаққа нық қадам басқан бүгінгі Қазақстанның тұғыры әбден бекіген мемлекет ретіндегі идеалдары, қағидаттары мен басымдықтары көрініс табады. Әрине қолданыстағы Ата Заң Қазақстанның тәуелсіз мемлекет ретінде дамуына елеулі үлес қосты. Мұны ешкім жоққа шығармайды. Сондықтан былтырғы 30 тамызда Конституцияның 30 жылдығын кеңінен атап өттік.