Президент отандастарын Еңбек күнімен құттықтады

Президент Қасым-Жомарт Тоқаев жексенбі, 27 қыркүйекте отандастарын Еңбек күнімен құттықтады, - деп хабарлайды Tengrinews.kz Ақорданың баспасөз қызметіне сілтеме жасап.

Төменде құттықтау мәтіні берілген:

"Құрметті отандастар!
Сіздерді Еңбек күнімен құттықтаймын!

Бұл - қарым-қабілетімен, ақыл-парасатымен және қажырлы еңбегімен қастерлі Отанымыздың өсіп-өркендеуіне зор үлес қосып жүрген түрлі мамандық иелері ұлықталатын, оларға құрмет көрсетілетін мерейлі күн.

Өз ісін жетік меңгерген кәсіби маман болу - қазіргі заманның аса маңызды талабы. Білікті, жауапкершілігі жоғары, еңбекқор және тәртіпті азаматтардың арқасында көптеген елдер, соның ішінде Қазақстан да әлеуметтік-экономикалық тұрғыдан мол табысқа жетуде.

Әлем халықтарына ортақ "Еңбек - бәрін жеңбек" нақыл сөзінің мәні зор, мағынасы терең. Табанды еңбек - жетістікке жетудің көзі. Адал ниетпен атқарылған әрбір іс - қадірлі, кез келген еңбек - зор құрметке лайық.

Бүгінгі таңда Қазақстан жаңа тарихи кезеңге қадам басты. Алдымызда ауқымды міндеттер тұр. Конституциямыз және онда айқын көрініс тапқан Әділетті Қазақстан, заңға бағыну, бірлік пен ынтымақ, еңбекқорлық пен ілгерілеу, табиғатқа қамқорлықпен қарау идеялары - еліміздің тұрақты дамуына жол ашатын темірқазық.

Қазір қоғамымызда "Адал адам - Адал еңбек - Адал табыс" атты жаңа этика қалыптасты. Былтыр Жұмысшы мамандықтар жылын атап өттік. Бұл бастама еңбек адамының қоғамдағы мәртебесін арттырып, тәлімгерлік дәстүрі мен еңбек әулеттерінің мән-маңызын нығайта түсуге тың серпін берді.

Мемлекет алдағы уақытта да азаматтарымыздың жан-жақты дамуы үшін қолайлы жағдай жасай береді. Жастарға кәсіби білім беру, олардың еңбек дағдыларын ұштау, сондай-ақ, өскелең ұрпақтың бойына аға буынның бай өмірлік тәжірибесі мен тағылымын сіңіру - аса маңызды міндет. Жастары жасампаз елдің болашағы да жарқын, дамуы да қарқынды болары айқын.

Біз ынтымағы жарасқан, мақсат-мүддесі ортақ біртұтас ұлт ретінде әділдік, табиғатты аялау, заң үстемдігі, өркендеу құндылықтары және, ең бастысы, еңбекқорлық қасиеті іс жүзінде орныққан ел боламыз. Мен бұған кәміл сенемін.

Құрметті отандастар, баршаңызға мықты денсаулық, амандық және толағай табыс тілеймін!

Еліміз өсіп-өркендей берсін!"

Қазақстанда Еңбек күні жыл сайын қыркүйектің соңғы жексенбісінде атап өтіледі. Бұл мереке еңбектің маңыздылығын паш етіп, дәрігерлер мен мұғалімдерден бастап, зауыттар мен фермалардағы жұмысшыларға дейін - ел игілігі үшін тер төгіп жүрген жандардың үлесін ескеруге арналған. Биыл қазақстандықтар бұл күнді 27 қыркүйекте тойлап жатыр.

Бізді Google-дың негізгі дереккөздер тізіміне қосыңыз