Путин Кремльде Қадыров пен Керимовті жеке өзі татуластырды

Шешенстан басшысы Рамзан Қадыров пен сенатор Сүлейман Керимов арасындағы жанжал Ресей президентінің Кремльдегі тікелей қатысуымен шешілді, деп хабарлайды Arasha.kz.

Екі ықпалды саясаткердің татуласқаны туралы Ресейдің бас мүфтиі Равиль Гайнутдин мәлімдеді. Бұл ВЧК-ОГПУ арнасының президент резиденциясында өткен кездесу туралы бұған дейін таратқан ақпаратын растайды.

«Біздің президенттің шақыруымен Мәскеу Кремлінің қабырғасында олар (Қадыров пен Керимов) толық келісім мен өзара түсіністікке келді», - деді Гайнутдин Рамазан айына орай мұсылмандарға жолдаған үндеуінде.

Қаңтар айының соңында Қадыров Керимовпен кездесу өткізіп, соңғы екі жылда алғаш рет оны қайтадан «бауырым» деп атады. Бұған дейін саясаткерлер арасындағы қарым-қатынас өте шиеленісті болған еді.

Текетірес 2024 жылы Wildberries маркетплейсіне бақылау орнату мәселесіне байланысты басталды. Қадыров пен Делимханов Керимовке және оның жасырын серіктесі  Президент әкімшілігінің басшысы Антон Вайноға қарсы тұрған болатын.

Жанжал Рамзан Қадыров шешен күш құрылымдарымен өткен кеңесте өзіне қатысты қастандық ұйымдастыру әрекеті болғанын мәлімдеген кезде шарықтау шегіне жетті. Шешенстан басшысы Wildberries кеңсесіндегі оқиғаларды еске алып, Сүлейман Керимовтің, Мемлекеттік дума депутаттары Бекхан Барахоев пен Ризван Курбановтың есімдерін атады.

«Ол жерде бизнес-жағдай болды. Барахоев Бекхан, Керимов Сүлейман, Курбанов Ризван — өздері кәсіпкерлер. Олар бұл әйелдің бизнесін тартып алып қана қоймай, маған қастандық жасауға тапсырыс берді. Куәгерлер бар, олар тапсырыс берген адамдар бар, олардан тапсырысты (Рамзан Кадыровты өлтіруге) қаншаға алатындарын сұраған. Егер ол керісін дәлелдемесе, мен Бекхан Барахоевқа, Сүлейман Керимовке және Ризван Курбановқа қанды кек жариялаймын», - деді ол шешен тілінде.

Бұл айыптауларға ешқандай қарсы дәлел ұсынылған жоқ.

Соған қарамастан, Қадыров пен Делимханов күтпеген жерден позицияларын өзгертті. Делимханов бейресми әңгімелерде мұны «бас бастықтың» (Путиннің) тапсырмасы деп түсіндірді.

Осыған ұқсас нұсқаны Керимов те айтқан болатын.

«Қадыровқа менімен сөйлесу үшін Путиннен рұқсат алу керек. Ал ол рұқсат ала алмайды», - деп мәлімдеген сенатор тар шеңберде.

Текетірестің соңы Кремльдегі жеке кездесумен аяқталып, президент дауды шешуде делдал ретінде бой көрсетті.