Қ. Тоқаев: көлік халыққа қолжетімді бола түседі

Елімізде KIA Qazaqstan зауытының іске қосылуы осы саланы технологиялық тұрғыдан жаңғыртуға зор серпін берері сөзсіз. Президент осылай деп, Кәсіпорын болашақта басқа да жаңа көлік түрлерін шығарады деп сенімін білдірді.

Сөз арасында Қасым-Жомарт Тоқаев енді азаматтарға автокөлікті лизингпен алу мүмкіндігі ұсынылатынын да жеткізді. Осы арқылы тұрғындар темір тұлпарды қолайлы шартпен сатып алуға мүмкіндігі туады.

Қасым-Жомарт Тоқаев, Қазақстан Республикасының Президенті:

- Мен жақында Үкіметке экономикалық ахуалды тұрақтандыру үшін нақты шаралар әзірлеу туралы тапсырма бердім. Үкімет бірқатар маңызды шешім қабылдады. Соған сәйкес енді азаматтарға автокөлікті лизингпен алу мүмкіндігі ұсынылады. Соның арқасында автокөліктер халыққа мейлінше қолжетімді бола түспек.

Мемлекет басшысы жиын соңында KIA Corporation президенті Хо-сунг Сонгты ІІ дәрежелі «Достық» орденімен марапаттады. Қазақ-корей ынтымақтастығының дамуына, қос халықтың арасындағы достықтың нығаюына қосқан үлесін жоғары бағалайтынын жеткізіп, еліміздің автокөлік саласын дамытуға сіңірген еңбегі мол екенін атап өтті.