Қайсар ару Қайыргүл: агентура қауіп қатердің ортасы

Қайыргүл Сайлауқызының полиция погонын таққанына биыл 19 жылдан асты. Осы уақыт ішінде ол қатардағы қызметкерден тәжірибелі аға жедел уәкілге дейінгі жолдан өтті. Павлодар өңіріндегі қылмыстық топтардың жолын кесу, заңсыз әрекеттерді әшкерелеу мен қоғамдық қауіпсіздікті сақтау жолында кейіпкеріміз талай күрделі тапсырмаларды орындады. Өңірлік ұйымдасқан қылмысқа қарсы күрес басқармасында жұмыс істеу тек физикалық дайындықты емес, ең алдымен аналитикалық ойлауды және психологиялық төзімділікті қажет етеді. Оның айтуынша, бұл салада әйел адамға тән қырағылық пен интуиция көбіне шешуші рөл атқарады.

Фото: Қайыргүл Сайлауқызының жеке архивінен

- Өзім Май ауданының тумасымын. Мектепті Семей өңірінде оқып, Алматыдағы қазақ қыздар педагогикалық институтын тәмамдадым. Кішкене кезімнен полиция киімін кигендерге қарап қатты қызығатынмын, оның үстіне нағашым ішкі істер органында қызмет етті. Сол әсер еткен болуы керек, 2007 жылы Павлодар қаласындағы Оңтүстік полиция бөліміне жұмысқа тұрдым. Тез арада тәжірибе жинап, маман болып қалыптасуыма көмек көрсеткен бірінші басшыларым Қ.Түсіпбеков пен Б.Бөлежановқа, тәлімгерлерім Ирина Кривова мен Гүлмира Дәулетшинаға, Айгерім Нұрбайқызына алғысым шексіз. Полицияда әйел немесе ер адам деп бөліну жоқ. Бізде тек ортақ міндет - заңдылықты қамтамасыз ету және азаматтардың тыныштығын қорғау ғана бар. Күн сайынғы қиындықтарға қарамастан, жұмысымды адал атқаруға тырысамын, - дейді Қайыргүл Оңалбаева.

Фото: Қайыргүл Сайлауқызының жеке архивінен

Ол қызмет ететін басқарма қылмысты ашу кезінде құпия істермен айналысады. Қылмыстық істі ашу барысында агентуралық қызметкерлер болады. Ол құпия ақпарат жинау мақсатында арнайы қызметтер тарапынан құрылатын, жасырын жұмыс істейтін агенттердің жиынтығы. Қайыргүлдің қазіргі міндеті - белгілі қылмыстық істерді тіркеу, олар бойынша анализдер жасау, қаулылар шығару, т.б. Қажет болса, мәліметтерді жинау үшін өңірлерге шығып, тыңшылық жасайды. Ұйымдасқан қылмыстық істер бойынша өңірде орман ағаштарын ұрлау, контрабандалық өнімдерді тасымалдау, кәсіпорындардың мүлкін тонау, ұйымдасқан қылмыстық топтар құру сияқты заң бұзушылықтар жиі тіркеледі екен.

Фото: Қайыргүл Сайлауқызының жеке архивінен

- Мәселен жақында Баянауыл ауданында Қызыл кітапқа енетін сұңқарларды ұстап, шетел асырмақ болған ұйымдасқан қылмыстық топ мүшелерін құрықтадық. Күдіктілер туралы мәліметтерді ұзақ жинадық. Нәтижесінде бұлтартпас айғақтарды табылды. Іздестіру барысында сату үшін темір торға қамап қойған 32 сұңқар анықталды. Қылмыстық іске қатысы бар тұлғалар қазір тергеліп жатыр. Оның алдында бірнеше жыл орманды отап келген ұйымдасқан қылмыстық топ мүшелерін анықтап, қолға түсірген едік. Осындай кешенді жұмыстардың арқасында заңға томпақ әрекет жасағандардың істері әшкере болуда, - деп қосты ол.

Айтуынша, облыстық полиция департаментіне қарасты ұйымдасқан қылмысқа қарсы күрес басқармасында 8 жылдан астам уақыт еңбек етіп келеді. Ұжымдағы кілең ерлер арасында небәрі 3 ару жұмыс істейтінін, алғашқыда қиын болғанымен бүгінде әбден төселіп алғанын жеткізді. Жылдам ойлау, дереу әрекет ету, жағдайды шұғыл түрде талдау – күнделікті талап етілетін дағдылар. Басқарма қызметкерлерінен жоспар сұралмайды, тек күнделікті шұғыл тапсырмаларды мезгілінде шешіп отырулары қажет.

Басқарма басшылығы Қайыргүлдің еңбек жолы жас мамандарға үлгі екенін айтады. Жиырма жылға жуық тәжірибесі бар офицер ретінде ол өзінің білімін кейінгі толқынға үйретуден жалыққан емес. Павлодар облысының криминогендік ахуалын жақсартуға қосқан үлесі үшін бірнеше мәрте ведомстволық марапаттармен және Алғыс хаттармен марапатталған. Отбасында бір ұл, бір қыз өсіріп отырған ардақты ана. Қызметтің ерекшелігіне байланысты бала тәрбиесіне жете көңіл бөле алмадым деп қынжылды. Әйтсе де, балалары мектепте үлгілі оқып, білім додаларында топ жарып жүр. Жеткіншектерінің жетістігі бойына қуат береді.

Сөз соңында Қайыргүл Сайлауқызы полицияға келгеніне ешқашан өкініп көрмегенін, керісінше мамандығын мақтан тұтатынын жеткізді. Аяулы жан барлық нәзік жандарды, соның ішінде погон таққан аруларды көктемнің шуақты мерекесімен құттықтап, бақ-береке тілейді.