Қалалар мен ауылдар әртүрлі нәрсені қалайды: қазақстандықтардың сауалнамасы не көрсетті

Қазақстандықтардан өздері тұратын елді мекендердің дамуын қалай бағалайтыны сұралды. Тұрғындардың көпшілігі кейінгі үш жылдағы оң өзгерістерді атап өтіп, алдағы уақытта да жаңару болады деп үміттенеді. Дегенмен жол мәселесі мен абаттандыру жұмыстары әлі де басты сұраныс ретінде қалып отыр, сондай-ақ халық медицина, интернет және коммуналдық инфрақұрылымға көбірек көңіл бөле бастаған. Ұлттық талдау орталығының 2026 жылғы шілде-тамыз айларында жүргізген жалпыұлттық сауалнамасы осындай нәтиже көрсетті, деп хабарлайды Tengrinews.kz.

Жастар анағұрлым оптимистік көзқараста

Қазақстан тұрғындарынан кейінгі үш жылда өз елді мекендеріндегі инфрақұрылым мен көрсетілетін қызметтердің сапасы жақсарды ма деп сұралды. Сауалнамаға қатысқандардың 68 пайызы оң жауап берді: 42 пайызы жағдайдың жақсарғанымен толық келіссе, тағы 26 пайызы көбіне келісетінін айтқан.

Бұл ретте респонденттердің 30 пайызы ешқандай өзгерісті байқамаған, ал 2 пайызы жауап беруге қиналған. Қалаларда тұрғындардың 71 пайызы, ауылдарда 62 пайызы оң динамиканы атап өтті.

Өзгерістерге жастар анағұрлым оптимистік баға беріп отыр: 18 бен 35 жас аралығындағы респонденттердің 78 пайызы жақсаруды байқаған. 36–50 жас аралығындағы топта бұл көрсеткіш 61 пайызды, ал 50 жастан асқан тұрғындар арасында 64 пайызды құрады.

Қазақстандықтардан өмір сүру жағдайлары туралы сұралды

Ағымдағы өмір сүру жағдайына берілген баға бұдан да жоғары болды. Респонденттердің 82 пайызы өз елді мекеніндегі жағдайға көңілі толатынын мәлімдеді. Оның ішінде 22 пайызы толықтай риза болса, 60 пайызы көбіне риза екенін айтқан.

ҚАЗІР ТАЛҚЫЛАНЫП ЖАТЫР

Астана-1 вокзалын жөндеу: қашан аяқталады және қазіргі жағдайы қандай?

05 қыркүйек 14:58 1

Сауалнамаға қатысқандардың 17 пайызы қазіргі жағдайға көңілі толмайтынын білдірсе, тағы 1 пайызы жауап беруге қиналған.

Қалаларда тұрғындардың 84 пайызы, ауылдық жерлерде 78 пайызы жағдайға риза. Жастар арасында бұл көрсеткіш 87 пайызға жетсе, 36–50 жас аралығындағыларда - 78 пайызды, ал 50 жастан асқан тұрғындар арасында 81 пайызды құрады.

Қазақстандықтар қандай жақсаруларды жиі атап өтті?

Респонденттерге кейінгі үш жылда өзгерістер айқын байқалған үш бағытты атау ұсынылды. Бірінші орында - жолдар (32 пайыз). Одан кейінгі орындарда:

абаттандыру - 29 пайыз; саябақтар мен көгалдандыру - 22 пайыз; мектептер мен балабақшалар - 18 пайыз; жаңа тұрғын үйлер - 15 пайыз; қоғамдық көлік - 11 пайыз; ауруханалар мен емханалар - 11 пайыз; интернет және мобильді байланыс - 7 пайыз; ТҮКШ - 6 пайыз.

Сонымен қатар сауалнамаға қатысқандардың 15 пайызы кейінгі үш жылда өз елді мекендерінде ештеңе жақсармағанын айтты.

Қала мен ауыл арасындағы айырмашылықтар байқалады. Қалалықтар саябақтар мен көгалдандырудың, жаңа тұрғын үйлер мен қоғамдық көліктің жақсарғанын көбірек айтса, ауыл тұрғындары жолдар мен ТҮКШ саласындағы өзгерістерді жиі атап өткен.

Қай салаларды дамыту қажет?

Болған өзгерістерге оң баға беру - тұрғындардың бұл жұмыстарды аяқталды деп санайтынын білдірмейді. Респонденттерден бірінші кезекте қай бағыттарды дамыту керектігін сұрағанда, тағы да жолдар мен абаттандыру мәселелері көш бастады (әрқайсысы 26 пайыздан).

Тізімнің жалғасы:

ауруханалар мен емханалар - 21 пайыз; интернет және мобильді байланыс - 20 пайыз; мектептер мен балабақшалар - 19 пайыз; ТҮКШ - 17 пайыз; саябақтар мен көгалдандыру - 16 пайыз; қоғамдық көлік - 13 пайыз; жаңа тұрғын үй - 10 пайыз.

Тағы 24 пайызы өз нұсқаларын ұсынды. Олардың ішінде экономикалық мүмкіндіктер, туризм, спорттық және мәдени инфрақұрылым жиі аталды.

Қала мен ауыл түрлі өзгерістерді күтеді

Сауалнамаға сәйкес, ауылдық жерлерде абаттандыруға, саябақтар мен көгалдандыруға, сондай-ақ интернет пен байланысқа деген сұраныс жоғары. Ал қалаларда қоғамдық көлікті, қоғамдық әжетханаларды дамыту және мүмкіндігі шектеулі жандарға арналған қолжетімді ортаны қалыптастыру қажеттілігі көбірек айтылады.

Жас мөлшері де басымдықтарға әсер етеді. Жас респонденттер жолдарды, мектептер мен балабақшаларды, саябақтарды, интернет пен қоғамдық көлікті жиі атайды. 50 жастан асқан адамдарда абаттандыру мен ТҮКШ мәселелеріне сұраныс жоғары.

Қазақстандықтар арасындағы сауалнама нені көрсетті?

Ұлттық талдау орталығының сауалнамасы 2026 жылғы шілде-тамыз айларында жүргізілді. Оған Қазақстанның 1000 кәмелетке толған тұрғыны қатысты. Сұхбаттар телефон арқылы CATI әдісімен жүргізілді, іріктеу жынысы, жасы, өңірі және елді мекен түрі ескеріле отырып жасалды.

"Түйіндей келе, тұрғындар үшін күнделікті физикалық ортадағы өзгерістер – ең алдымен жолдар, абаттандыру, саябақтар мен көгалдандыру неғұрлым байқалатынын атап өтуге болады. Осы бағыттар әрі қарайғы дамудың басты басымдықтары қатарында қалып отыр, яғни нәтиженің көрінуі осы бағыттағы жұмыстарды жалғастыру туралы сұранысты жоймайды. Сонымен қатар, медицина, интернет пен мобильді байланыс, ТҮКШ салалары ең айқын жақсартулар ретінде емес, көбіне басымдықтар ретінде аталады, бұл аталған салалардың қоғамдық күтулердегі маңыздылығын көрсетеді", - деп атап өтті зерттеу авторлары.

Google News арқылы жаңалықтарымызды қадағалаңыз

Жазылу