Қалибек Қуанышбаев атындағы қазақ ұлттық музыкалық драма театры 36 шы жаңа маусымын ашады

9 қыркүйек күні Қалибек Қуанышбаев атындағы Қазақ ұлттық музыкалық драма театры жаңа 36-шы маусымын ашады, - деп хабарлайды Aikyn.kz.

 «Қарагөз» трагедиясы – қазақ драматургиясының алтын қорындағы шоқтығы биік шығармалардың бірі. Спектакльде Сырым мен Қарагөздің тағдыры арқылы махаббат пен дәстүр, жеке адамның таңдауы мен қоғамдық көзқарас арасындағы қайшылықтар көрсетіледі. Қоюшы режиссері – Қазақстанның еңбек сіңірген қайраткері Гүлсина Миргалиева. Қоюшы суретші – Қанат Мақсұтов. Композитор – Олжас Дәлелхан. Хореограф – Салтанат Сұңғат. Киім суретшісі – Мадина Қосмағанбетова.

Қарагөз рөлін актриса, ҚР «Дарын» Мемлекеттік Жастар сыйлығының лауреаты Ақмарал Танабаева, Сырымды Әнуар Бектас, Нарша рөлін Бәзіл Сұлтанғазы сомдайды. Сонымен қатар, спектакльде «Құрмет» орденінің иегерлері Майра Омар, Ержан Нұрымбет, Қазақстанның еңбек сіңірген қайраткерлері Қуандық Қыстықбай, актриса Айнұр Жетпісбаева және тағы басқа актерлер өнер көрсетеді.

Жаңа маусымда театр көрерменге классикалық шығармалармен қатар, заманауи драматургия туындыларын және түрлі жанрдағы спектакльдерді ұсынады. Қыркүйек айының репертуарында Ә.Нұрпейісовтың «Қан мен тер» драмасы, М.Әуезовтің «Абай» қойылымы, С.Тұрғынбекұлының «Шәмші» элегиясы, Ж.Әлікеннің «Жүрек сыры. Махаббатым сен...» драмасы, М.Жұмабаевтың «Шолпанның күнәсі» драмасы, У.Шекспирдің «Romeo& Juliet» синема-эпосы, балаларға арналған «Ертегі түннің әуені» классикалық ертегілер жиынтығы мен «Құмқала», «Бала мерген» ертегілері, Л.Толстойдың «Анна Каренина. Роман парақтары» хореодрамасы, Қ.Жиенбайдың «Патша көңілім, не дейсің?!.» комедиясы, Б,Брехттің «Шеңбер» драмасы, С.Балғабаевтың «Қыз жиырмаға толғанда» мелодрамасы, Д.Исабековтың «Қазақы комедия немесе Бонапарттың үйленуі» комедиясы, «Кешкі 7» спектакль-концерті, Е.Жуасбектің «Үйлену» музыкалық комедиясы, Ш.Айтматовтың «Қызыл орамалды шынарым» лирикалық драмасы, Г.Бюхнердің «Войцек» драмасы,  Э.Хушвақтовтың «Қызыл алма» лирикалық комедиясы, Р.Мұқанованың «Бопай ханым» спектакльдері ұсынылады.

Сонымен қатар, театр ұжымы бірқатар республикалық және халықаралық фестивальдерге қатысып, өңірлерге гастрольдік сапар ұйымдастыруды жоспарлап отыр.

Қыркүйек айында Қазақстанның еңбек сіңірген қайраткері Гүлсина Миргалиеваның режиссерлігімен сахналанған Мағжан Жұмабаевтың «Шолпанның күнәсі» драмасы Павлодар қаласында өтетін «Ертіс-Баян» республикалық театрлар фестиваліне қатысады.

Олжас Жанайдаровтың «Жұт» драмасы (режиссері Айрат Абушахманов) Арқалық қаласына, Жангелдин және Амангелді ауылдарына гастрольдік сапармен аттанады. Бұл сапар театр өнерін өңір көрермендеріне жақындатып, шығармашылық байланыстарды нығайтуға мүмкіндік береді.

Қазан айында Лев Толстойдың «Анна Каренина. Роман парақтары» хореодрамасы (режиссері Рача Махатаев) ТеатрALL Халықаралық театр фестиваліне қатысады.

Театр  репертуарындағы Т.Әбдіктің «Парасат майданы» спектаклі (режиссері Г.Миргалиева) қазан айында Қарағанды қаласында өтетін Әшірбек Сығай атындағы «Сын – шын болсын» республикалық фестиваліне шақырту алды.

Қараша айында театрдың 35 жылдық мерейтойы аталып өтеді. Мерейтой аясында театрдың шығармашылық жолын саралап, өнер ұжымының бүгінгі тынысын танытатын бірқатар іс-шара ұйымдастырылады.

Театрдың жаңа 36-шы маусымы ұлттық классика мен заманауи драматургияны тоғыстыра отырып, көрерменге сан алуан жанрдағы жаңа қойылымдар мен шығармашылық жобаларды ұсынып, театр өнерінің жаңа белесін қалыптастыруға бағытталады.