Қалжыңдауға болмайды . Қазақстан әуежайларындағы отырғызу талондарында маңызды ақпарат пайда болды

Қазақстандағы жолаушыларға енді әуежайда қандай тақырыпта әзілдеуге болмайтыны арнайы ескертіледі. Халықаралық әуежайларда отырғызу талонының артқы бетіне жалған террорлық қауіп туралы хабар бергені үшін қылмыстық жауапкершілік қарастырылатыны жазылған ескерту енгізілді, - деп хабарлайды Tengri Travel.

Бұл бастаманы Бас көлік прокуратурасы көтерген. Ведомство өкілдерінің айтуынша, ескертуді әр жолаушы міндетті түрде көретін жерге - отырғызу талонының өзіне орналастыру туралы шешім қабылданған.

Ескертудегі негізгі жазбалардың бірі - "Бомба туралы әзіл қылмыстық жауапкершілікке әкелуі мүмкін".

Жолаушыларға әуежайда бомба немесе басқа да террорлық қауіп туралы айтылған сөзді жай әзіл деп қабылдауға болмайтыны ескертілді. Егер мұндай сөз әдейі жалған террорлық қауіп туралы хабар ретінде бағаланса, тіпті ойланбай айтылған сөздің өзі қылмыстық жауапкершілікке әкелуі мүмкін.

Яғни ұшар алдында "менде бомба бар" деп қалжыңдау - айналадағылар күліп, ұмыта салатын жағдай емес.

Отырғызу талонының артқы бетінде жалған хабарлама туралы ескертуден бөлек, тасымалдауға тыйым салынған заттар да көрсетілген.

Олардың қатарында кастет, атыс қаруы, оқ-дәрі және басқа да қауіпті бұйымдар бар.

Осылайша жолаушыларға ұшар алдында қауіпсіздік талаптары тағы бір рет еске салынады.

Қазір мұндай тәжірибе Астана, Алматы, Түркістан және Қарағанды халықаралық әуежайларында енгізілген.

Еліміздің өзге әуежайларында да мұндай материалдарды алдағы уақытта орналастыру жоспарланып отыр.

Жаңа ескертулерге әлеуметтік желі қолданушылары да назар аударған. Соның ішінде блогер Айдархан Мейрхан отырғызу талонындағы жаңа жазбалар туралы бөлісті.

Бас көлік прокуратурасы бұл бастаманың мақсаты - жолаушыларға ережелер мен оларды бұзудың салдарын алдын ала ескерту екенін түсіндірді.

Ведомство мұндай ескертулер құқықбұзушылықтың алдын алуға және әуе сапары кезіндегі қауіпсіздікке жауапкершілікпен қарауға ықпал етеді деп үміттенеді.

Енді отырғызу талонында рейс нөмірі, орын және басқа да мәліметтермен бірге тағы бір маңызды ескерту бар: әуежайда бомба туралы әзіл жай қалжың емес.

Бұған дейін саяхат сарапшылары қағаз отырғызу талонын рейстен кейін бірден тастамауға, ал электрон нұсқасын өшіріп жібермеуге кеңес берген. Өйткені сапар аяқталғаннан кейін де бұл құжат әуе компаниясымен туындаған дауды шешуге, есептелмей қалған бонустық мильдерді алуға немесе сақтандыру компаниясына өтініш беруге қажет болуы мүмкін.

Google News арқылы жаңалықтарымызды қадағалаңыз