Қаңтар айындағы ҰБТ ға қатысуға 187 мың адам өтініш берді

АЛМАТЫ, 31 желтоқсан - Sputnik. Қаңтар айында өтетін ұлттық бірыңғай тестілеуге қатысуға 187 мың адам өтініш берді, деп хабарлайды ғылым және жоғары білім министрлігі.

2026 жылғы қаңтар айында өтетін ҰБТ-ға қатысу үшін өтініш қабылдау аяқталды. 187 мыңға жуық адам тестілеуден өтуге ниет білдірді, бұл өткен жылмен салыстырғанда 20 мыңға көп. ҰБТ 10 қаңтар мен 10 ақпан аралығында өтеді.

Талапкерлер өтініш беру барысында олар тестілеу күнін, уақытын және пунктін өздері таңдады.

"ҰБТ барысында калькулятор, химиялық элементтердің периодтық жүйесі яғни Менделеев кестесі және тұздардың ерігіштік кестесі тестілеу бағдарламасында қолжетімді болады. Тест тапсырушылар тестілеу аяқталғаннан кейін 30 минут ішінде апелляцияға өтініш бере алады. Апелляцияға өтініш берген тестіленушілердің сертификаты аппеляциялық комиссияның шешімінен кейін талапкердің жеке кабинетінде шығады", - дейді министрлік.

Келесі жылы Ұлттық бірыңғай тестілеудің форматы өзгеріссіз қалады. Талапкерлер үш міндетті пәнді және таңдауы бойынша екі бейіндік пәнді тапсырады. ҰБТ тапсырмаларының жалпы саны – 120.

"Қазақстан тарихы" пәні бойынша - 20 тапсырма,

"Оқу сауаттылығы" - 10 тапсырма

"Математикалық сауаттылық" - 10 тапсырма.

Сондай-ақ екі бейіндік пәннің әрқайсысынан 40 тапсырмадан беріледі. ҰБТ бойынша ең жоғары балл да өзгермейді және 140 балды құрайды.

Тестілеу уақыты – 4 сағат (240 минут). Бұл ретте ерекше білім беру қажеттіліктері бар балалар үшін қосымша 40 минут уақыт беріледі.