Қарағанды облысында ақылды жетондар сынақтан өтуде

Қарағанды облысында полиция қызметіне заманауи технологиялар енгізілді.

Өңірде қызмет барысында болған барлық жағдайды таспалайтын «ақылды» жетондар сынақтан өтуде. Бұл жаңа құрылғылар Теміртау қаласында қолданыла бастады. Қазір мұнда 238 жетон жұмыс істеп тұр. Сырт көзге ұялы телефонға ұқсайтын құрылғының басты міндеті – бейнетүсірілім жасау. Егер қандай да бір себеппен полицей камераны өшірсе, диспетчер оны қашықтан қосып, жағдайды дер кезінде бақылай алады. Барлық бейнематериал автоматты түрде Ішкі істер министрлігінің қорғалған жүйесіне жіберіліп, арнайы серверде сақталады. Жүйе кибершабуылдардан толық қорғалған.

Дулат Рапишев, Қарағанды облысы Полиция департаменті бөлімінің бастығы:

- Бұл құрылғылар сыртқы әсерлерге төзімді, кез келген ауа райында жұмыс істей береді. Камера шамамен 4 сағат бойы үздіксіз түсіре алады. Сондай-ақ оларға қосымша қуаттағыштар беріледі.