Қарағанды облысында стадионды жаңғырту жұмысы жалғасады

Қарқаралыда орталық стадионды күрделі жөндеу жұмысы қайта жанданады. Мердігер өз міндетін дұрыс орындамай, құрылыс тоқтап қалған еді. Жергілікті билік онымен келісімшартты бұзып, жобаны қайта қарады. 

Тау бөктерінде орналасқан стадионға бұрынғыдай су кірмес үшін, жоспарға өзгерту енгізілді.

Қарқаралыдағы стадион 1970 жылы салынған. Күрделі жөндеу аясында нысанда 300 орындық трибуна, киім ауыстыратын бөлмелер, жаттықтырушылар кабинеті, жаттығу залы және қосымша баскетбол мен волейбол алаңы салынуы тиіс еді. Сондай-ақ жүгіру жолағы мен футбол алаңын жаңғырту керек. Алайда жұмыс аяқсыз қалды.

Стадионды күрделі жөндеу 2022 жылы басталды. Жоба құны – 352 миллион теңге. Мердігер бір жылдан соң нысанды тапсыруға міндеттелген болатын. Алайда жөндеу жұмысы кестеден кешігіп, сапасына қатысты сұрақтар туындады.

Мейірлан Сәдуақасов, Аудандық құрылыс, сәулет және қала құрылысы бөлімінің меңгерушісі:

- Негізі құрылыс жұмыстары 2023 жылы аяқталуы керек болатын. Мердігердің жауапсыздығына байланысты, құрылыс жұмыстарын кестеге сай жүргізбеуіне байланысты жауапсыз деп танылып, келісімшарт бұзылған.

Жергілікті билік жобаны қайта қарап, оған өзгерту енгізді. Стадион тау бөктеріндегі су жылғаларына жақын орналасқан. Қар еріп, жаңбыр жауғанда алаңға су кіретін кездер жиі болады. Сондықтан стадионның айналасын бекітіп, алаңның топырағын биіктету, суағарлар салу сынды инженерлік шешімдер қабылданған. Келесі жылы жаңа мердігер таңдалып, құрылыс жұмысына бақылау күшейтілетін болады. Оған қаржы жергілікті бюджеттен және демеушілердің көмегімен бөлінеді. 

Авторлары: Руслан Нұрланұлы, Сайран Ақамбаев, Аман Хамит