Қарағандыда көктайғақтан 30 жол апаты болды

Кеше жауын жауса, бүгін қар түсіп, ауа температурасы 5 градусқа дейін төмендеді. 

Салдарынан жолдар көктайғаққа айналды. Қарағандыдан Астанаға дейінгі тасжолда жылдамдыққа шектеу қойылды. Коммуналдық қызмет күшейтілген режимге көшті. Кешеден бері қала ішіндегі жолдарға 250 тоннадан астам құм-тұз қоспасы себілді.

Жүргізушілердің көбі көлік дөңгелегін қысқыға ауыстырып үлгермеді. Автокөлік жөндейтін орындарда ұзын-сонар кезек. Біраз орталық тәулік бойы жұмыс істеп жатыр. Көктайғақ болғалы, келуші саны бірнеше есе артқан.

Родион Воротников, көлік жөндеу шебері:

- Осылай ұзақ кезекте тұрмас үшін бәрін қар түспей тұрып істеген дұрыс. Дөңгелекті екі апта бұрын ауыстырған жөн немесе ең болмағанда қосалқы дискі жиынтығы болғаны жақсы.

Қарағандының екі ауданында қар тазалауға 170 техника шықты.  Коммуналдық мекеменің 250 жұмысшысы жұмылдырылды.

Азат Ақынов, Ә. Бөкейхан атындағы ауданның тіршілікті қамтамассыз ету бөлімінің басшысы:

- Жолдарды тазалау жұмысы күшейтілді. Кеше кештен бастап мердігер ұйымдар жолдарға, аялдамаларға, және тротуарларға  құм-тұз қоспасын септі. Шамамен 250 тоннадан астам құм-тұз қоспасы жұмсалды.

Қалада көктайғақтан 30 жол апаты болды. Көбі жылдамдықты асыру және қашықтықты сақтамаудың салдарынан. Жүргізушілер болса жолдар дер кезінде тазаланбады деп отыр.

Вадим Калилин, қала тұрғыны: 

- Жол тайғақ, апат болмас үшін асықпау керек. Байқағаным көп жерге құм-тұз қоспасын сеуіп үлгермеген.  Жұмыс ауқымы көп болғаннан шығар. Қыс әлі алда. Сондықтан коммуналдық қызмет жақсырақ жұмыс істесе екен деген тілек бар.

Қарағанды-Астана тас жолында қозғалыстың рұқсат етілген жылдамдығы 140-тан 80ге   дейін төмендетілді. Патрульдік полиция батальоны күшейтілген жұмыс режиміне көшті. Барлық автожолда қосымша экипаждар кезекшілікке шықты.

Бағдат Какимов, облыстық Полиция департаментінің басқарма  бастығы:

- Облыстық және республикалық маңызы бар автожолдарда көктайғақ. Сондықтан сақтық шараларын қатаң сақтауды ескертеміз. Көлікті қыс маусымына алдын ала дайындаған жөн. жолға шықсаңыз ауа райы жағдайына сәйкес жылдамдықпен жүрген абзал.

«Өңірде қарлы бұрқасын мен көктайғақ ертеңге дейін сақталады», -дейді мамандар. Ауа температурасы кей жерлерде -13 градусқа дейін төмендейді. Төтенше жағдай қызметі тұрғындарға алыс сапарға шықпауға кеңес береді.

Авторлары: Руслан Нұрланұлы, Сайран Ақамбаев, Аман Хамит