Қарағандыда Мерейлі отбасы байқауының жеңімпаздары анықталды

Қарағандыда «Мерейлі отбасы» ұлттық байқауының облыстық кезең  жеңімпаздары анықталды.

Аймақ бойынша іріктеу кезеңіне 500-ден астам отбасы қатысты. Ақтық сынға шыққандардың бәрі жоғары деңгейде өнер көрсеткіндіктен қазылар алқасына жеңімпазды анықтау оңайға соқпады.

Достық үйінде аймақтың әр түкпірінен 26 үздік отбасы жиналды. Көпшілігі өсіп-өнген үлкен әулеттер. Бас жүлде Саран қаласынан келген Ключниковтар отбасына бұйырды. Шаңырақ иесі шахтер боп еңбек етеді. Әулетінің көмір өндірісіндегі еңбек өтілі 80 жылдан асады. Ал жұбайы дәрігер.

Анастасия Ключникова, Саран қаласының тұрғыны:

- Бәсекелестік жоғары болды. Жеңіске жеткенімізге қуаныштымын. Отбасы құндылығын бір-біріне сенім арту, ешнәрсені жасырмау және жақындарыңа қамқор болу деп білемін.

Енді Ключниковтар отбасы елордада өтетін республикалық кезеңде облыс намысын қорғайды. Ұйымдастырушылардың айтуынша, «Мерейлі отбасы» байқауының жыл өткен сайын маңызы артып келеді.

Айжан Қиясова, облыстық ҚХА Аналар кеңесінің төрағасы:

- Қазіргі отбасылардың бұл конкурсқа қатысамын деген ынтасы да, отбасымды ортада көрсетем деген ниеті де, әртүрлі өнері, шеберлігі көбейіп келе жатыр. Ол біз үшін өте үлкен қуаныш. Ең басты мақсатымыз-бізде қазір отбасы құндылықтары деп айтып жатырмыз. Сол отбасы құндылығын қоғамымызда, мемлекетімізде насихаттау.

«Мерейлі отбасы» байқауына шахтерлар, мұғалімдер, дәрігерлер және  өзге де еңбек әулеттері қатысты. Әр аталымда үздік атанғандар бағалы сыйлықтармен марапатталды.

Авторлары: Руслан Нұрланұлы, Сайлау Игіліков, Аман Хамит