Қаражұмановтар әулетінің Мамлют ауданындағы жалпы еңбек өтілі 600 жылдан асады

Солтүстік Қазақстан облысында еңбек өтілі 6 ғасырдан асатын еңбек династиясы тұрады. Бұл әулеттің 30 мүшесі ғұмырын түрлі салаға арнаған жандар.

Әке жолын қуған Мұрат Қаражұманов өмір бойы механизатор болып жұмыс істеп келеді. Қазір оның ізін ұлы басып, мал фермасында еңбек етеді.

Мұрат Қаражұманов егін шаруашылығына 40 жылға жуық өмірін арнаған жан. Біраз жыл комбайн тізгіндеді. Ал қазір қырдағы астықты жүк көлігіне артып қырманға тасиды. Білікті механизатор бос уақытында Абайдың шығармаларын оқиды. Оның бастамасымен серіктестікте музыкалық үйірме ашылып, әріптестері домбыра тартуға және Абай мен Мағжанның сөздеріне жазылған әндерді орындауға үйреніп жүр. Осылайша ол жастарды еңбекқорлыққа баулып, ұлттық құндылықтарды дәріптеуге зор үлесін қосып келеді.

Мұрат Қаражұманов, механизатор:

- Абай атамыздың айтқаны бар ғой: «Еңбек етсең ерінбей, тояды қарның тіленбей» деген. Сол сияқты бәрі еңбектің арқасы. Қаншама уақыт бойы істеген еңбегіміздің нәтижесін көріп жатырмыз. Биыл ауа-райының қолайсыздығына қарамастан астықты жинап, уақытында қоймаға құйып алдық. Биылғы өніміміз жақсы шықты. Сол бәрі еңбектің арқасы ғой.

Қаражұмановтар әулетінің Мамлют ауданындағы жалпы еңбек өтілі 600 жылдан асады. Бұл 30-дан аса отбасы мүшесінің өз ісіне деген адалдығын көрсетеді. Оның ішінде Мұрат Қаражұмановтың қосқан үлесі мемлекет тарапынан жоғары бағаланып, «Еңбек Даңқы» орденімен марапатталды. Ұрпақ сабақтастығын ұлы Мақсат та жалғастырып келеді.

Мақсат Мұратұлы, Мал азығын дайындау цехінің операторы:

- Әкеміз еңбекқор. Әкеміз кішкентай кезімізден ақыл үйретіп, тәрбиелеп, әкемізге қарап, үлгі алып, жұмысында жақсы жұмыс істеп бізге үйретіп келе жатыр. Үйде таңғысын ерте кетіп, кешкісін қараңғы түскенде келеді.

Қаражұмановтар отбасы «Мәмбетов және К» командиттік серіктестігінде жұмыс істейді. Биыл олар 26 мың гектар жерге дән сіңіріп, мол өнімге қол жеткізді. Қазір орақ науқанын толық аяқтап, астықты шашау шығармай жинап алды.

Құсайын Ахметов, «Мәмбетов И К» КС атқарушы директоры:

- Дәнді-дақылдар жоғары нәтиже көрсетті. Мысалы, қатты бидай әр гектарынан орташа есеппен 30 центнерден өнім берді. Майлы дақылдар да жақсы шықты. Бұл ретте мемлекеттің қолдауы зор болды. «Кең дала» бағдарламасының арқасында көкөтемгі және күзгі дала жұмыстарын уақытылы атқардық. Біздің компанияда Қаражұмановтар династиясы көптен бері жұмыс істейді. Олардың еңбегі ерең.

Осы жылы Мемлекет басшысының тапсырмасымен солтүстікқазақстандық диқандарға 130 млрд теңге қаржылай қолдау көрсетілді. Шаруаларға «Кең дала» бағдарламасы бойынша жеңілдетілген несиелер берілді. Осының арқасында биыл облыс бойынша 6 млн тоннадан аса астық жиналды.

Авторлары: Айдарбек Айтмұхамбетұлы, Төлеген Иманов