Қарттар күніне орай кей өңірлерде 20 мың теңгеден беріледі

АСТАНА, 29 қыркүйек – Sputnik. Биыл 1 қазан – Қарттар күніне орай бірқатар өңірде зейнеткерлерге біржолғы әлеуметтік төлем беріледі, деп хабарлайды Sputnik Қазақстан.

Бұл төлем республикалық бюджеттен емес, жергілікті бюджеттен беріледі. Сондықтан оның мөлшерін әр өңір өзі анықтайды.

Астанада ең төмен зейнетақы алатын зейнеткерлерге – 2,5 АЕК немесе 10 812,5 теңге;

Шымкентте 70 жастан асқан тұрғындарға – 3 АЕК немесе 12 975 теңге;

Ұлытау облысында ең төмен зейнетақы алатын зейнеткерлерге – 20 000 теңге;

Қарағанды облысында 75 жастан асқан тұрғындарға – 21 625 теңге.

Төлемді алу үшін өтініш берудің қажеті жоқ. Қаражат тиісті санатқа жататын азаматтардың есепшоттарына автоматты түрде аударылады.

Айта кетері, Қарттар күніне арналған біржолғы әлеуметтік төлем барлық өңірде берілмейді. Мұндай көмек әр облыстың бюджет мүмкіндігіне қарай көрсетіледі. Кей өңірлерде оның орнына басқа да әлеуметтік қолдау шаралары қарастырылған.