Қасым Жомарт Тоқаев Трамптың шақыруымен Майамиде өтетін G20 саммитіне қатысады

Кездесу барысында тараптар екіжақты ынтымақтастықтың өзекті мәселелерін, сондай-ақ Қазақстан мен АҚШ арасындағы кеңейтілген стратегиялық серіктестікті одан әрі нығайтудың перспективаларын талқылады.

Ермек Көшербаев сұхбаттасына Қазақстанда жүргізіліп жатқан саяси және әлеуметтік-экономикалық реформалар туралы мәлімет берді. Өз кезегінде америкалық тарап ынтымақтастықты одан әрі нығайтуға мүдделі екенін растады. Сонымен қатар энергетика, аса маңызды минералдар, озық технологиялар, цифрландыру, көлік және инвестиция салаларындағы практикалық өзара іс-қимылды кеңейтуге елеулі мүмкіндік бар екенін атап өтті.

Қазақстанның су ресурстарын басқарудың жаһандық құрылымын нығайту жөніндегі бастамасына ерекше назар аударылды. Соның ішінде Президент Қасым-Жомарт Тоқаевтың БҰҰ-ның мамандандырылған мекемесі ретінде Халықаралық су ұйымын құру туралы бастамасы талқыланды.

"Бұдан кейін 2026 жылғы желтоқсанда Майамиде өтуі жоспарланған G20 саммитіне дайындық мәселелері жөнінде пікір алмасу болды. Аталған саммитке Мемлекет басшысы АҚШ Президенті Дональд Трамптың шақыруымен қатысады", – делінген ҚР Сыртқы істер министрлігі баспасөз қызметінің хабарламасында.

Осыған байланысты тараптар жоғары деңгейдегі кездесудің күн тәртібін мазмұнды ету мақсатында өзара іс-қимылды одан әрі жалғастыруға дайын екенін білдірді.

G20 саммиті немесе "Жиырмалық тобы" – әлемнің аса ірі дамыған және дамушы экономикалары көшбасшыларының жыл сайынғы кездесуі. Онда әлемдік қаржылық тұрақтылық, орнықты даму, сауда және жаһандық саясаттың аса маңызды мәселелері талқыланады.

2026 жылғы 22 қаңтарда Қасым-Жомарт Тоқаев Давоста АҚШ Президенті Дональд Трамп ұсынған халықаралық бастама – Бейбітшілік кеңесінің Жарғысына қол қойды. Бірлестікке қатысу – мемлекеттің егеменді шешімі, ал оған мүше болу мерзімі үш жылды құрайды.