Қауіпсіз демалыс үшін тур сатып алғанда нені тексеру керек

Тур сатып алар кезде турист өз қауіпсіздігі мен құқықтық қорғалуын қамтамасыз ету үшін бірнеше негізгі құжаттарды тексеруі қажет. 

Ең алдымен турагенттің қызметін ресми түрде бастағаны туралы хабарламасы бар екеніне көз жеткізу керек. Компания міндетті түрде мемлекеттік электронды тізілімге енгізілген болуы тиіс.

Сапарды рәсімдеудің басты кезеңі – туристік қызмет көрсету туралы шартқа қол қою. Онда ел мен мерзім, турдың толық құны, төлем тәртібі, бас тарту талаптары, тараптардың жауапкершілігі және қаражатты қайтару шарттары нақты көрсетілуі тиіс.

Қаржылық құжаттарға ерекше назар аудару қажет: төлем жасағаннан кейін фискалдық чек талап етіңіз. Қаражатты жеке шоттарға аудармаңыз, тек ресми төлем құжаты мәмілені дәлелдейді.

Тур толық төленгеннен кейін турагент туристке сапарға қажетті құжаттар пакетін ұсынуға міндетті. Оның ішінде қонақ үй, тамақтану және трансфер туралы мәліметтер көрсетілген ваучер, әуе билеттері немесе маршруттық түбіртектер, сақтандыру полисі және туристердің құқықтарын міндетті кепілдендіру жүйесі аясындағы туркод болуы тиіс.

Төтенше жағдай туындаған жағдайда туристерге Қазақстан Республикасы азаматтарының шығу туризмі саласындағы құқықтарына кепілдік беру жүйесінің «Туристік Қамқор» жедел желісіне дереу хабарласу ұсынылады: +7 700 112 2 112

Бүгін, 17:50