Қауіпсіздік, медицина және демалыс мүмкіндіктері зейнеткерлер үшін ең жақсы елдер аталды

Зейнетке шыққанда жайлылықтан бас тартпай, көбірек саяхаттағыңыз келсе, ел таңдау сапар құнына ғана байланысты емес. Зерттеушілер 100 мемлекетті қауіпсіздік, медицина сапасы, жаяу жүруге қолайлылық, қарттарға арналған жеңілдіктер мен мәдени мүмкіндіктер бойынша бағалады. Tengri Travel зейнеткерлерге ең қолайлы елдер туралы баяндайды.

Рейтинг қалай жасалды?

Зерттеуді Firebird Tours компаниясы жүргізді. Авторлар 100 елді жеті критерий бойынша бағалаған:

65 жастан асқан халықтың үлесі; зейнеткерлерге арналған жеңілдіктердің болуы; жаяу серуендеуге қолайлылығы; денсаулық сақтау сапасы; қауіпсіздік; Жаһандық бейбітшілік индексіндегі орны; үлкен жастағы адамдар үшін қызықты болуы мүмкін мәдени іс-шаралар мен көрікті жерлер саны.

Авторлар елдерді зейнеттегі өмір сапасы тұрғысынан: жайлылық пен қауіпсіздік деңгейінен бастап, демалыс пен араласу мүмкіндіктеріне дейін қарастырғанын нақтылады.

Қай елдер үздік деп танылды? Жапония

Жапония рейтингте бірінші орында тұр, бұған елдегі қарттар үлесінің жоғарылығы да себеп болған - тұрғындардың 29,5 пайызы 65 жастан асқан. Зерттеу авторлары ел инфрақұрылымының егде жастағы адамдарға жақсы бейімделгенін атап өтті.

Мәселен, Токио ұлттық мұражайына 70 жастан асқан адамдар тегін кіре алады, ал астананың өзі жаяу серуендеуге қолайлылығы үшін ең жоғары баға алды.

Жергілікті денсаулық сақтау жүйесі ДДҰ қауіпсіздік индексі бойынша әлемде 16-шы орында. Сондай-ақ елде ЮНЕСКО-ның 26 Дүниежүзілік мұра нысаны мен 351 Michelin жұлдызды мейрамханасы бар.

Сонымен қатар Жапония Жаһандық бейбітшілік индексінің алғашқы ондығына кіреді, ал зерттеудегі қауіпсіздік көрсеткіші 22,2.

Фото: depositphotos.com

Германия

Германия 133 ұпай жинап, жалпы рейтингте екінші орынға ие болды. Ел ЮНЕСКО-ның Дүниежүзілік мұра нысандарының көптігімен (54 нысан) және 336 Michelin жұлдызды мейрамханасымен ерекшеленеді.

Зерттеу авторлары қарт адамдарға арналған қоғамдық көліктегі жеңілдіктерді бөлек атап өтті. Берлин жаяу жүруге қолайлылығы үшін ең жоғары баға алса, неміс денсаулық сақтау жүйесі авторлар қолданған рейтингте әлем бойынша жетінші орында тұр.

Испания

Испания дәстүрлі түрде егде жастағы саяхатшылар арасында танымал бағыт саналады және бұл рейтингте де ол үздік үштікке енді.

Мысалы, Мадридтегі Прадо мұражайында зейнеткерлерге 50 пайыздық жеңілдік беріледі. Астана жаяу серуендеуге қолайлылығы үшін жоғары бағаланды, ал Испанияның денсаулық сақтау жүйесі әлемде 15-ші орында.

Елде ЮНЕСКО-ның 50 Дүниежүзілік мұра нысаны орналасқан. Олардың арасында Гранададағы Альгамбра мен Кордованың тарихи орталығы бар.

Дегенмен, зерттеуде көрсетілген зейнеткерлерге арналған қоғамдық көліктегі жеңілдіктер резиденттерге ғана қолжетімді. Туристерге бұл жеңілдік жүрмейді.

Словения

Словения рейтингтің басты тосынсыйының бірі болды. Ол Швейцария, Франция, Италия және АҚШ сияқты танымал бағыттардан озып кетті.

Авторлар қауіпсіздікті елдің басты артықшылықтарының бірі ретінде атайды. Жаһандық бейбітшілік индексінің көрсеткіші 1,369 - бұл зерттеуге енген елдер арасындағы үшінші нәтиже. Қауіпсіздік көрсеткіші - 24,5.

Қарт адамдарға қоғамдық көлікте жеңілдік беріледі, ал Қазіргі заман тарихы ұлттық мұражайы шамамен 27 пайыздық жеңілдік ұсынады. Любляна да жаяу серуендеуге қолайлылығы үшін жоғары баға алды.

Авторлар ел аумағының шағын болуы астанада серуендеуді таулы аймақтар мен басқа өңірлерге сапарлармен ұштастыруға мүмкіндік беретінін айтады.

Фото: depositphotos.com

Швейцария

Швейцария ең алдымен қауіпсіздіктің арқасында жоғары нәтижеге қол жеткізді. Оның Жаһандық бейбітшілік индексіндегі көрсеткіші 1,363 - бұл рейтингтегі елдер арасында Жаңа Зеландиядан кейінгі екінші нәтиже.

Бұл елде де қарттар үшін қоғамдық көлікте жеңілдіктер бар, жаяу серуендейтін жерлер өте көп және денсаулық сақтау сапасы жоғары (осы рейтингте әлем бойынша 20-орын).

Сондай-ақ Швейцарияда ЮНЕСКО-ның 13 Дүниежүзілік мұра нысаны мен 112 Michelin жұлдызды мейрамханасы орналасқан.

Бұл ретте Швейцария Еуропадағы ең қымбат елдердің бірі. Алайда, бұл зерттеу аясында өмір сүру құны негізгі критерий болған жоқ.

Алғашқы ондыққа келесі елдер кірді:

Жапония; Германия; Испания; Словения; Швейцария; Австрия; Дания; Финляндия; Нидерланд; Канада.

Айта кетейік, қазақстандық аға буын саяхатшылары да ерекше маршруттарды жиі таңдайтын болған. Мәселен, 83 жастағы Дина әже шөбересімен бірге Данангқа аттанды, ал олардың сапарынан түсірілген суреттер желіде 400 мыңға жуық қаралым жинады.

Тағы бір мысал - Түркияға сапары кезінде парапланмен ұшуға бел буған 74 жастағы Рзағүл Жәнібекова. Саяхаттан соң ол алған әсерін бөлісіп, өзге туристерге кеңес берді.

Тағы оқыңыз: 73 жасында арманын орындауға бел буды: қазақстандық әжейдің ерекше хоббиі Қазнеттің назарын аударды

Google News арқылы жаңалықтарымызды қадағалаңыз

Жазылу