Қазақ фильмі ЮНЕСКО да көрсетілді

Париждегі ЮНЕСКО-ның бас пәтерінде мүмкіндігі шектеулі жандардың халықаралық күніне орай қазақстандық «Үміт сәулесі» фильмі көрсетілді, деп хабарлайды 24KZ. Режиссер Думан Еркінбек түсірген парадзюдошы Ерғали Шәмейдің ішкі күресі туралы лента мүгедектігі бар адамдардың инклюзиясына арналған қысқаметражды фильмдердің екінші фестивалі бағдарламасына енді.

Қазақ картинасы ЮНЕСКО жанындағы Қазақстанның Тұрақты өкілдігінің, Мәдениет және ақпарат министрлігі мен Ұлттық киноны қолдау мемлекеттік орталығының ұсынысымен халықаралық байқауға енді. Биыл фестивальге түрлі елдерден 25 туынды қатысып жатыр. Барлық фильм мүмкіндігі шектеулі жанның құқықтары, қиындықтары мен жарқын жетістіктері туралы баяндайды. Фильмнің басты кейіпкері Ерғали Шәмей 2024 жылы Парижде өткен Паралимпиадада дзюдодан күміс медаль еншілеген болатын.

Линда Тинио-Ле Дуарен, ЮНЕСКО инклюзия, құқықтар және мәдениетаралық диалог секциясы басшысының орынбасары:

- Біз фестиваль бағдарламасына Қазақстанның қысқаметражды фильмінің енгеніне қуаныштымыз. Негізгі мақсатымыз – мүгедектігі бар адамдардың құқықтары мен қиындықтарына қоғамның назарын аудару. ЮНЕСКО жақында осындай адамдарды қолдауға бағытталған алғашқы инклюзия стратегиясын қабылдады, ол бас конференцияда бірауыздан мүше мемлекеттердің қолдауына ие болды.