Қазақ мектептеріне маман дайындайтын білім ордасы

Ташкенттегі Низами университетінде қазақ тілі мен әдебиеті кафедрасы бар.

Мұнда Өзбекстандағы қазақ мектептері үшін мұғалім мамандары оқытылады. Ұжым алдағы уақытта Қазақстандағы жоғары оқу орындарымен ынтымақтастық орнатып, бірігіп жұмыс істеуді жоспарлап отыр.

Өзбекстанның алты бірдей ЖОО- нда қазақ тілі мен әдебиеті кафедрасы жұмыс істейді. Олардың екеуі Ташкент пен Шыршықта, төрт университет қазақтар көп қоныстанған Нөкіс пен Науайы шахарларында. Барлығы осы елдегі қазақ мектептері үшін маман даярлайды. Түлектердің кейбірі Қазақстанның оңтүстік өңірлерінде де еңбек етіп жүр.

Жаннұр Амангелдиева, студент:

- Төрт жыл бойы білім алдық әрі түрлі шараларға, әдеби кештерге қатыстық, мұның барлығы біздің болашақта таңдаған мамандығымызға деген сүйіспеншілігімізді арттырып, біліктілігімізді асырды десек болады.

Низами атындағы ұлттық педагогика университетінде қазақ тілі мен әдебиеті кафедрасының жұмыс істеп жатқанына 70 жылдан асқан. Осы уақыт аралығында сан мыңдаған білікті маман түлеп ұшты. Сабақты өз ана тілінде оқитын жастар қазақтың ақын жазушыларының шығармаларына қанық.

Нұржан Абдувалитов, педагогика ғылымдарының кандидаты, доцент:

- Қазақ тілі мен әдебиеті пәнін мүмкіндігінше интерактивті әдістерді қолдана отырып оқытамыз. Жастардың келешекте өзіндік пікірге ие болған, қорытынды шешім қабылдай алатын жастарды тәрбиелеуге бар күшімізді салып жатырмыз.

Қазір мұнда 100 студент білім алып жатыр. Бір курстағы 25 студенттің арасында он бала тегін білім алады. Қазақстанмен байланысты нығайту мақсатында біздегі жоғары оқу орындарымен ынтымақтастық орнату көзделіп отыр.