Қазақ сәулет өнерінің көрнекті өкілі Алмас Ордабаев өмірден озды

Бұл туралы әлеуметтік желідегі парақшасында Жәмилә Стехликова хабарлады.

«Бүгін менің әкем Алмас Ордабаев қайтыс болды. Ол мен үшін қалай өмір сүру және қалай өмірден өту керектігінің үлгісі болып қалды. Арғы күні жұбайы Ольгаға қоштасатынын айтып, соңғы салған картиналарына қол қойды. Кеше менімен қоштасты. Бүгін Прагадан немерелерімен қашықтан қоштасып, қол бұлғап, соңғы рет амандық тіледі. Күлімсіреп, бізді жақсы көретінін айтты. Жарты сағаттан кейін өмірден өтті», деп жазды ол.

Алмас Ордабаев – кеңестік және қазақстандық сәулетші, графикалық дизайнер, материалдық мәдениет тарихшысы, Алматыдағы Каспий университеті сәулет және дизайн кафедрасының профессоры.

Ол 1938 жылғы 19 сәуірде Ресейдің Новосибирск қаласында дүниеге келген. Алайда сол жылдың мамыр айынан бастап Алматыда тұрған.

Жоғары білімді 1959 жылы Ленинград инженерлік-құрылыс институтының сәулет факультетінде, ал 1962 жылы Қазақ политехникалық институтының өнеркәсіптік және азаматтық құрылыс факультетінде білім алған. 2007 жылы «Қазақстан сәулетінің ежелгі дәуірден ХХ ғасырдың басына дейінгі тарихы» тақырыбында диссертация қорғап, PhD дәрежесін алған.

Алмас Ордабаевтың маңызды еңбектерінің қатарында Қазақстан Республикасының ең жоғары мемлекеттік наградасы Халық Қаһарманы белгісінің дизайнын әзірлеуі және Қазақстан Республикасы Ұлттық ұланының формасын жасауға қатысуы бар.

Сондай-ақ ол «Қазақстан XX ғасырдың басына дейінгі сәулет тарихы», «Қазақ киіз үйі», «Қазақ таңбалары», «Қазақ оюы» атты төрт монографияның және сәулет, өнер мен мәдениеттану салалары бойынша 80-нен астам ғылыми мақаланың авторы.

Алмас Ордабаев Қазақстан Өнер академиясының құрметті академигі атанды. Ол Қазақстандағы көптеген тұрғын үй кешендерінің, алаңдардың, ескерткіштердің, музейлердің және этнотуристік қалашықтардың авторларының бірі саналады. Оның еңбектерінің қатарында Алматыдағы Тәуелсіздік алаңы, ғалымдар үйі және басқа да маңызды нысандар бар.

Марқұмның туыстары мен жақындарына көңіл айтамыз!