QazaqGaz Саралжын учаскесінде геологиялық барлау жұмысын бастайды

АСТАНА, 23 желтоқсан – Sputnik. "QazaqGaz" ҰК" АҚ мен Энергетика министрлігі Саралжын учаскесі бойынша жер қойнауын пайдалану жөнінде келісімге қол қойды, деп хабарлады компанияның баспасөз қызметі.

Аталған участок Батыс Қазақстан облысының Казталов, Бөкей Орда және Жаңғала аудандарының аумағында орналасқан.

"Участок жаңа көмірсутек қорының анықталуы тұрғысынан перспективалы болып саналады. Геологиялық барлау жұмыстарының жүргізілуі, сондай-ақ Каспий маңы шөгінді бассейнінің орталық бөлігінің геологиялық құрылысы туралы нақты зерттеу жасауға мүмкіндік береді", - деп жазылған хабарламада.

Келісімге қол қою геологиялық барлау шараларының толық кешенін жүргізуге мүмкіндік береді, оған сейсмикалық барлау, іздеу-барлау ұңғымаларын бұрғылау және кейінгі кезеңде учаскені өнеркәсіптік игеру перспективаларын бағалау кіреді.

"QazaqGaz" ҰК" АҚ заманауи экологиялық стандарттар мен өнеркәсіптік қауіпсіздік талаптарына сәйкес жұмыстарды жүргізуді жоспарлап отыр.