Қазақмыс Ұлытау облысындағы геологиялық барлау жұмыстарын күшейтті

Фото: KAZAKHMYS

2026 жылы «Қазақмыс» Жезқазған өңіріндегі геологиялық барлау жұмысын қаржыландыруды айтарлықтай ұлғайтты. Бұған дейін бұл мақсатқа жыл сайын шамамен 5 млн доллар бағытталса, бүгінде инвестиция көлемі жылына 40 млн долларға дейін жетті. Қаражат Жезқазған кен алабының терең қабатын зерттеуге, жаңа перспективалы учаскелерді іздеуге және өңірдің минералдық-шикізат қорын кеңейтуге бағытталып отыр.

Сонымен қатар компания бұрғылау жұмысының көлемін айтарлықтай арттырып жатыр. Егер алдыңғы жылдары пайдалану мақсатындағы бұрғылаудың көлемі жылына шамамен 63 мың қума метрді құраса, 2026 жылы тек Жезқазған бағыты бойынша 62,4 мың қума метр геологиялық барлау үшін бұрғылау жүргізу жоспарланған. Бұл ретте айта кетерлігі, Жезқазған компанияның геологиялық барлау бағдарламасындағы үш өңірлік бағыттың бірі болып саналады. Осыған орай геологиялық барлау жұмысының жалпы ауқымы шамамен екі есе ұлғайды.

Бағдарламаны іске асыру үшін Ұлытау облысында қазірдің өзінде алты заманауи жерүсті бұрғылау қондырғысы іске қосылды. Бұған қоса жалпы құны 1,3 млрд теңгені құрайтын үш жерасты бұрғылау агрегаты мен қосалқы техниканы сатып алу жұмысы жүргізіліп жатыр. Жерүсті бұрғылау жұмысына арналған екі бұрғылау қондырғысы күрделі жөндеуден өтті. Сондай-ақ бұрғылау бригадаларының жұмысына қолайлы жағдай жасау және инфрақұрылымды жаңарту жұмысы жалғасып келеді.

«Қазақмыс» әлеуметтік бағдарламаларымен 5,7 мыңнан астам адам қамтылды

2025 жылы жүргізілген геофизикалық зерттеудің қорытындысы бойынша үш перспективалы учаскеде бұрғылау жұмысы басталды. Оңтүстік Итауыз, Соркұдық–Жартас учаскелерінде және Жыланды кен орындары тобында қосымша жұмыс атқару жоспарланған. Терең қабаттарда жүргізіліп жатқан зерттеулер Жезқазған кен орнының геологиялық құрылымы туралы жаңа дерек алуға, сондай-ақ тереңде жатқан кен денелерінің әлеуетін бағалауға мүмкіндік береді.
Кен орындарының терең қабаты мен қапталдарын зерттеу жобаларына салынған жалпы инвестиция көлемі техника сатып алуды қоспағанда 2,27 млрд теңгені құрайды. Мамыр айынан бастап қосымша бұрғылау күші жұмылдырылып, шілде айына қарай өндірістік алаңдарда онға жуық бұрғылау қондырғысын пайдалану жоспарланған.

«Қазақмыс» корпорациясына жаңа басшы тағайындалды

Жүргізілген жүйелі геологиялық барлау жұмысының нәтижесінде көлемі 63,5 млн тонна кенді құрайтын резервтік кен орындарының портфелі қалыптастырылды. Оның құрамында 620,3 мың тонна мыс және 12,9 тонна алтын бар. Бұл қордың елеулі бөлігі мемлекеттік балансқа енгізілді.

Сонымен қатар компания заманауи цифрлық технологияларды белсенді түрде қолдануда. Геологиялық бөлімшелерде кен орындарының үшөлшемді моделін құруға және геологиялық деректі интерпретациялау дәлдігін арттыруға мүмкіндік беретін Micromine жүйесі енгізіліп жатыр. Бағдарлама бойынша 177 маман оқытудан өтті, болашақта жүйені пайдаланушылар санын 401 қызметкерге дейін арттыру жоспарланып отыр.

Компанияда атап өтілгендей, Ұлытау облысындағы геологиялық барлау жұмысын кеңейту – өңірдің болашағына салынған инвестиция. Жаңа қорлар қолданыстағы өндірістік қуатты тұрақты жүктемемен қамтамасыз етіп, жұмыскерлердің ұзақ мерзімді жұмыспен қамтылуына әрі Жезқазған өңіріндегі тау-кен металлургия кешенінің одан әрі дамуына жол ашады.

«Қазақмыс» – әлеуметтік жауапкершілігі жоғары үздік компания

Айта кетейік, бұған дейін «Қазақмыс» әлеуметтік бағдарламаларымен 5,7 мыңнан астам адам қамтылғаны туралы жаздық.