Қазақстан аумағын кең ауқымда геологиялық зерттеу бағдарламасы жалғасады

— Алдағы үш жылда 100 мың шаршы шақырым аумақта 1:50 000 масштабтағы түсірілім бағдарламасы жүргізіледі. Бұл жұмыстар қашықтан зондтау әдістерінен бастап аэрогеофизикалық және геохимиялық зерттеулерге дейінгі заманауи тәсілдер көмегімен жүргізіледі. Сонымен бірге, Шу-Сарысу және Солтүстік Торғай сияқты жеткілікті зерттелмеген мұнай-газ әлеуеті бар шөгінді алаптарда сейсмикалық барлау жұмыстарын жүргізу жоспарланып отыр. Алынған нәтижелер кейін егжей-тегжейлі іздеу және барлау жұмыстарын жүргізуге негіз болады, — деді Ерсайын Нағаспаев.

Сонымен бірге, жер қойнауын пайдалану процестерін ауқымды цифрландыру көзделіп отыр.

— Былтыр жер қойнауын пайдаланудың Бірыңғай платформасы іске қосылды. Ол өтінім беруден бастап лицензия беруге дейінгі толық цифрлық циклді қамтамасыз етеді. Платформада 22 мемлекеттік қызмет жұмыс істейді, электрондық аукциондар енгізілген және жазылым бонусын онлайн төлеуге арналған «электрондық әмиян» сервисі іске қосылған. Оған қоса, биыл бастапқы геологиялық ақпарат цифрландыру жұмыстары аяқталады. Бұл процестерді жүйелі басқаруға мүмкіндік береді, рәсімдердің ашықтығын арттырады және инвесторлар үшін қолайлы орта қалыптастырады, — деді сала министрі.

Үшіншіден, Ұлттық геологиялық қызметке кеңейтілген өкілеттіктер берілді. Атап айтқанда, жер қойнауын мемлекеттік геологиялық зерттеуді ұйымдастыру және жүргізу, мемлекеттік мониторингті жүзеге асыру, бірыңғай мемлекеттік кадастрды жүргізу, геологиялық инфрақұрылымды дамыту және саланы нығайту мен дамытуға бағытталған өзге де міндеттерді іске асыру құзыреті берілді.

— Аймақтық өзара іс-қимыл мәселесіне де ерекше тоқталғым келеді. Жер қойнауын барлау, пайдалану және қорғау жөніндегі Үкіметаралық кеңес аясындағы ынтымақтастықтың маңызы зор. Бұл алаң өңір мемлекеттері арасында келісілген шешімдер қабылдауға және тәжірибе алмасуға тиімді мүмкіндік береді. Біз өңірдегі саланың келесі даму кезеңі мына бағыттарға негізделуі тиіс деп санаймыз: жер қойнауын геологиялық зерттеу тәсілдерін үйлестіру; геологиялық ақпарат алмасуды дамыту; шекаралас аумақтарды қоса алғанда, перспективалы құрылымдарды бірлесіп зерттеу; өзара үйлесімді цифрлық геологиялық платформаларды қалыптастыру. Бұл жерде халықаралық әріптестік пен жаһандық технологиялық компаниялардың қатысуы маңызды рөл атқара алады, — деді Ерсайын Нағаспаев.

Министрдің айтуынша, Қазақстан геологиялық салада өзара тиімді серіктестікті кеңейтуге және бірлескен бастамаларды жүзеге асыруға ашық.

Бұған дейін министр жер қойнауын игерудің дәстүрлі моделін түбегейлі қайта қарауды қажет ететін уақыт келгенін айтқан еді.

Алдағы 3 жылда геологиялық барлау жұмыстарын қаржыландыру 500 млн долларға жетеді.