Қазақстан электронды үкімет әлемдік рейтингінде 24 ші орында

Қазақстан электронды Үкіметтің даму индексі бойынша, жаһандық рейтингте 24-ші орынға жайғасты. Бұл туралы жыл бойы жеткен жетістіктер мен атқарылған жұмыстарды жіпке тізген Жасанды интеллект министрі Жаслан Мәдиев айтты.

БАҚ өкілдерінің алдында есеп берген ведомтсво басшысының сөзінше, онлайн қызметтер индексі бойынша еліміздің көрсеткіші тіпті жоғары. Үздік 10 елдің тізіміне енген. Сонымен қатар Алем Клаут ұлттық супер-компьютерлік кластері, әлемдегі ең ірі супер-компьютерлердің үздік 500 рейтингінде 86-шы. Осылайша, Қазақстан есептеу қуаты бойынша, өңір көшбасшыларының бірі ретінде, өзін тағы бір мәрте дәлелдеп отыр.

Жаслан Мәдиев, ҚР Премьер-министрінің орынбасары, жасанды интеллект министрі:
- Бұл ұстанымдар цифрлық жетілу деңгейін ғана емес, сонымен қатар мемлекеттің басқару тәжірибесіне жасанды интеллектіні ауқымды түрде енгізе алу қабілетін де көрсетеді. Қазақстан жасанды интеллектіні ауқымды енгізу және цифрлық экономиканың негізгі көрсеткіштерінің тұрақты өсуін қамтамасыз ету арқылы жетекші цифрлық держава мәртебесін нығайтуда.

Биыл Қазақстанның айти экспортының көлемі 700 млн долларға жеткен. Министр цифрлық экономиканы дамытудың басты тетігі Астана хаб экожүйесі болып қала беретінін айтады. Себебі бұл алаң бүгінде 2 мыңға жуық айти компанияның басын біріктіріп отыр. Ал қатысушылардың табысы 800 млрд теңге болыпты. Халықаралық хабтар арқылы шетелдік нарыққа 100-ден астам стартап жобамыз шыққан.