Қазақстан халқының қолында 1,5 млрд доллардың 9 тонна алтыны бар

Бүгін ҚР Ұлттық банкінің деректері бойынша 1 грамм алтын 79971,37 теңге тұрады. Яғни, қазақстандықтар 719,742 млрд теңгенің немесе 1,467 млрд доллардың алтын құймаларына иелік етеді, деп хабарлайды Arasha.kz.

Ұлттық банк 2025 жылы екінші деңгейлі банктерге және жекелеген банктік емес айырбастау пунктеріне жалпы салмағы 889,5 келі болатын 27807 өлшеуіш құйманы өткізді. 2025 жылы өлшеуіш құймаларды өткізудің ең көп көлемі Алматыға (20526 дана, 74%), Астанаға (1650 дана, 6%) және Шымкентке (1099 дана, 4%) тиесілі болды, деп жазды «Чёрный лебедь, рак и щука» телеграм арнасы.

2025 жылы банктер мен айырбастау пунктері халыққа кері сатып алуды есепке алғанда жалпы салмағы 1,1 тонна болатын 40799 өлшеуіш құйма сатқан. Бағдарлама басталғаннан бергі өткізудің жалпы саны – жалпы салмағы 9 тонна болатын 263479 алтын құймасын құрайды.

Халық арасында салмағы 10 грамм болатын құйма ең үлкен танымалдылыққа ие. Оның жалпы сату көлеміндегі үлесі 26% – 67833 дананы құрайды. Одан кейін 5 грамдық – 57847 дана (22%), 100 грамдық – 53289 дана (20%), 20 грамдық – 49154 дана (19%) және 50 грамдық – 35356 дана (13%) құймалар келеді.

Алтын құймалары нарығының өтімділігін қамтамасыз ететін басты фактор – бұл банктер мен банктік емес айырбастау пунктерінің құймаларды клиентке ақшасын «күнбе-күн» төлей отырып, кері сатып алу мүмкіндігі.